Paggatassiinikkut qaleralinniarneq iluatsinngitsoorpoq
KNAPK-mmi Kalaallit Nunaannilu sulisitsisut peqatigiiffiata GAp ataatsimoorlutik Naalakkersuisunut marsimi allagaqarnikkut paggatassiinikkut aalisarnissaq isornartorsioraluarpaat ajutoornissaalu siulittuutigalugu.
Tassalumi allaqquttussaasimanngimmat Qeqertarsuup tunuani ukioq naallugu umiatsiaararsorluni qaleralittassaagaluit maanna nungujaarpaat, asulu Uummannami Upernavimmilu qaleralittassat aamma nungungajalersut nalunaarutigineqarluni.
Periutsimmi maanna atuuttut 2014-miit aatsaat atuutsinneqalernissai KNAPK-p GA-llu marsimi siunnersuutigigaluarpaat.
- Maleruagassammi nutaat atuutilinnginnerini apeqqutit akineqartussaagaluartut amerlapput. Periusermi nutaaq atorlugu paggatassiinerup kingunipilui maanna takusinnaanngorpavut. Aalisartummi sapinngisartik tamaat aalisarniapallapput, pisassiissutigineqartullu nungukkaangata qaavatigut pisasseqqinneqarnissartik naatsorsuutigisarlugu, KNAPK-mi pisortaq Petrus Biilmann KNR-imut taama oqaluttuarpoq.
Aamma Kattuffiit mianersoqqusinerigaluannik Naalakkersuisut tusaanngitsuusaarsimaneri GA-miit aamma eqqumiigineqarpoq.
- Qeqertarsuup tunuani pisut qaleralittassanik aqutsinerluttoqarnera takutiinnarpaat. Uagummi KNAPK-lu ataatsimoorussatsinnik siunnersuusioratta umiatsiaararsortunut pisassiissutinut maleruagassat angallatit anginernut atuuttunut assigusumik pilersitsisoqarnissaa siunnersuutigigaluarparput, taamaasiortoqarsimasuuppammi umiatsiaararsortut ukioq naallugu tulaassuinissaminnut periarfissaqassagaluarmata, GA-mi siunnersorti Bent Sørensen oqarpoq.
Taamaammat nunatsinni sumiiffinnut immikkut pisassiisoqartarnissaq GA-p siunnersuutigaa, taamaasiortoqarsinnaappammi aalisartut illoqarfigisamik qanitaani pisassanut salliutinneqalissagaluarput. Ilami Qeqertarsuup tunuani qaleralinnut akigititaasut unammillernerup kingunerisaanik qaffasinnerummata nunatta sinnerani aalisartorpassuit taavunnga aalisariakaasut malunnarmat.
Qeqertarsuulli tunuani qaleralittassat maanna nungoriikatapput, aalisartullu aappaagu aatsaat qaleralittasseqqinneqarnissartik utaqqisariaqalerlugu.
Taamaammat pisasseeriaatsip umiatsiaararsornermi atorneqalernissaa kisimi aqqutissaasoq KNAPK-mit GA-millu nalilerneqarpoq.
Aamma partii Siumut pisoq pillugu nalunaaruteqarpoq Naalakkersuisullu eqeersimaarnerulernissaat kaammattutigeriarlugu kattuffiit suleqatigalugit aaqqiissutissiornissaat kaammattuutigaat. Taannaannaanngilarli. Ukiarumi Inatsisartut katersornissaanni ukiormanna pisut uteqqinneqaqqunagit aaqqiissutissamik Siumukkormiut siunnersuummik saqqummiussaqarniarput.
Naalakkersuisulli kukkuluttorsimanerminnik nassueruteqarnissaat KNAPK-p tungaaniit ilimagineqarpallaanngilaq.
- Ilami maleruagassat nutaat pillugit aalisartut kattuffiisa oqaatigisaat pillugit Naalakkersuisut tusaaniannginnerat takoreerparput. Taamaammat uagut oqaatigisatsinnut tullissaani tusaaniarnerunissaat neriuutigiinnarsinnaavarput, KNAPK-mi pisortaq Petrus Biilmann oqarpoq.