Paatsuuisoqarnerarpaa

Venstrep gruppiani allatsip Jens Vibjergip Atlantikup avannaani suleqatigiit Folketingimi sunniutaarutsinniarneqarneraagaanerat ilumuunnginnerarpaa. - Paatsuuineruvoq, Jens Vibjerg radioaviisimut oqarpoq.
Allattoq Mads Lynge
decembarip 13-at 2007 13:42

- ”Clearingsystem”-imik taaneqartartup atorneqartarnissaa gruppit allattaasa akornanni oqallisigisarput. Taasineqaraangat innuttaasut piumasaannut taasineq naleqqunnerusariaqartoq isumaqarpugut. Aaqqitassat oqaluuserisagut annikitsuaqqatut oqaatigineqarsinnaapput. Innuttaasut folketingimut qinersisut piumasaat taasinerni takuneqarsinnaanerusariaqarmata, Jens Vibjerg oqarpoq.

Folketingimi ilaasortat atlantikup avannaaneersut maanna aaqqissuussiniarnermi sunniuteqarnerat allannguuteqassangatinneqanngitsoq, Jens Vibergip aamma oqaatigaa:

- Ilaasortat atlantikup avannaaneersut sunniuteqarnerat allaannguuteqassangatinngilara, ullumikkut oqimaaqatigiinneq ilaasortat 179-iunerini taamaaginnarnissaa takorloorparput, atlantikup avannaani ilaasortat taaseqataanngikkaangata imaluunniit taaseqataagaangata, Jens Vibjerg oqarpoq.

Teknikikkut aaqqitassat aaqqinniaannarneqartut Jens Vibjergip aamma oqaatigaa.

Naalakkersuisut konservativini ilaasortaasimasup Pia Christmas-Møllerip anineratigut amerlanerussuteqarnerat kipiluttunarsiortinneqarpoq. Taamaammat amerlanerussuteqalaaginnarnerup annertusineqarnissaa uani siunertarineqarnersoq Jens Vibjerg aperineqarami ima oqarpoq:

- Naamik, ”clearingsystem”-ip atuunnerata aaqqiivigineqarnissaa sulissutigineqaannarpoq, amerlanerussuteqaqqalaarneq allanngortinniarneqanngilaq, Vibjerg radioaviisimut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq