Paasititsiniaanissaq Naalakkersuisut pilersaarutigaat
Naalakkersuisut siulittaasuat Hans Enoksen tusagassiutinut taama allappoq. Hans Enoksen ukiortaami oqalugiarami ilaatigut oqarpoq, Namminersorneq pillugu innuttaasunik novembarip ulluisa 25-anni 2008 taasititsisoqassasoq, tamannalu illuatungiliuttunit tusagassiorfinnillu apeqquserneqarpoq.
Tusagassiutinut nalunaarummi allassimavoq illoqarfiit nunaqarfiillu sapinngisamik amerlanerpaat tikinniarneqartut.
Paasissutissanilli naqitanik saqqummertunik Kalaallit Nunaanni inoqutigiit tamarmik nassinneqartarnissaat anguniagaavoq. Namminersorneq pillugu Isumalioqatigiissitap inatsisissamut siunnersuutaata eqikkarneqarnera tassani aamma ilaassaaq.
Maannamut isikkoqarpoq, Kalaallit Qallunaat Namminersorneq pillugu Isumalioqatigiissitaata maannamut pilersaarutigigaa juunip ulluisa 21-anni 2009 Namminersorneq nunatsinni atuutilerumaartoq. Tamanna angumerineqarsinnaassappat maani nunatsinni 2008-p naajartornerani innuttaasunik taasititsisoqartariaqarpoq, Hans Enoksen allappoq.
