Paasititsiniaaneq malinnaaffigiuminaallunilu paasiuminaappoq
-Aallakaatitsineq aallartiinnartoq assorsuaq paasiuminaallereerpoq teknikkkut ajutooqattaarnerit utaqqilaaqqusinerit tusarsaalereermata.
Aammattaaq peqataasut qallunaat kalaallillu politikeriisa saqqummiussaat pingaaruteqarluinnartut paasinanngillat, ilaatigut qallunaatut saqqummiussat isiginnaartunut naalaartunullu nutserneqanngillat, taamatullu kalaallisuumiit illuanut, naak innuttaasut isummernissaannut tamakku pingaaruteqarluinnaraluartut, Hendrik Nielsen oqarpoq, nangillunilu.
-Tusarnaartut puigorneqarput, naak Katuami kalaallisuinnaq qallunaatuinnarlu oqaasillit peqataasut tusartaatimikkut nutserunneqaraluartut naalaartartut nutserunneqanngillat.
-Paasititsiniaaneq aaqqissuulluagaanerusariaqaraluarpoq, aallakaatitsinerlu innuttaasut isummernissaminnut tunngavissarsiffiginerusinnaasariaqagaanik ingerlanneqartariaqaraluarluni, Hendrik Nielsen paasitsiniaanermut soqutiginnilluni malinnaasimagaluarluni paasiuminaangaarmata aalisariarluni aallaannartariaqarsimasoq oqarpoq.
-Paasititsiniaaneq agguataarlugu ulluni arlalinni ingerlanneqartariaqaraluarpoq, aallakaatitsineq ullaa´tungaaniit nal. Qulingiluaniit ullo´qeqqata tungaanut ingerlanneqartarluni. Aamma soorlu assersuutigalugu qallunaaq saqqummiippat naalaartut eqqarsaatigalugit nutserisoq nutserinissaminut periarfissaqartitaasariaqaraluarpoq. Paasititsiniaaneq aaqqissuulluagaanerusariaqarpoq aallakaatitsinerlu innuttaasut isummernissaminnut tunngavissarsiffiginerusinnaasariaqagaannik ingerlanneqartariaqarpoq, Hendrik Nielsen paasititsiniaanermut pakatsisimasoq naggasiilluni taama siunnersuuteqarpoq.