Paasissutissiissut:

Aalisarneq pillugu nassuiaat inatsisartut ukiaq manna ataatsimiinneranni siusinnerusukkut saqqummiuteriartareerlugu saqqummiussassaq nutartigaq Simon Olsenip ualeru oqaluttarfimmit saqqummiutissavaaa.

Kingullermik tunuartikkallarnera oqaasertaasa danskisuumit kalaallisuumut nutsernerliuinermik ilaatigut pissuteqarpoq illuatungiliuttunillu politikikkut anguniagaqarnertut ilaatigut oqaatigineqarluni allaat naalakkersuisumut tatiginninnginnertut nipeqaqqajaalluni, ualerulu saqqummiussineq tatiginninnginnermik kinguneqassanersoq arlaannaataluunnit oqaatiginngilaa. Ualeru oqallinnerup tamanna paasinarsitissavaa.

Saqqummiussassarli qulequtaannaanerusunik imaqarpoq, siunissami aalisarnermut politikkissaq naalakkersuisunit naatsumik oqaasertalerneqarluni nungusaataanngitsumik ingerlatsinikkut anguniarneqassasoq siunissaq ungasinnerusoq eqqarsaatigalugu inuiaqatigiit aningaasarsiornerannut annertunerpaamik iluanaarutinngussasoq pisuussutit kalaallit aalisartuinit iluaqutigineqarlutik.

Anguniakkallu tamatuma anguniarnissaanut aalisarneq pillugu isumalioqatigiissitaq suli 2005-p upernarnerata tungaanut suligallassaaq, taamalu 2005-imi aatsaat politikikkut aalajangiineqassaaq ualeru oqallinnerup inernera tunngavigalugu.

Aalisarnermut peqatigiiffinnit anguniagassatut taaneqartut ilagaat pisassat nutaamik aaqqissuussiffigisariaqarnerat, aalisakkat pillugit EU-mut isumaqatigiissutip nutarternissaa, aalisarnerup aningaasaliinissamut pisariaqartitsinera, nioqqutissiaasinnaasunillu nutaanik qalluilluni misileraanissaq.

Aaamma KNAPK-p kissaatai ilanngunniarneqarumaartut qularnanngilaq, pingaartumillu ESU aqqutigalugu tapiisarnerup taamaatinnissaa taasani pineqarumaarpoq aalisarnerullu ineriartorteqqinnissaa piuminarsarniarlugu KNAPK-p siunnersuutaanut ilaavoq aalisarnerup ineriartortinneranut ingerlatseqatigiiffimmik pilersitsinissaq inuiaqatigiit ilaatigut akileraaqataaneratigut aningaasalersugassamik. KNAPK-p naatsorsuineri siulliit tunngavigalugit ingerlatseqatigiiffik taanna 80 milliuuni koruuninik imaqartussiaavoq.

Aamma aalisartut ilinniartitaanerulernissaat KNAPK-p piorsaaffigeqquaa, aalisarnermullu piniarnernullu nutaamik atuarfiliornissaq aqqutissat ilaattut taaneqarluni.