Paasissutissat sivisuumik apuunniarsimasut
Tasiilami isertitsivimmi pissutsit pillugit paasissutissat Folketingip ombudsmandianut qaammatit qulingiluat apuunniarsimasimapput.
Tasiilami isertitsiviup ulikkaaqqasarnera pissutsillu pitsaannginnerat pillugit Sermitsiap septemberimi allaaserinninnerata kingunerisaanik, Folketingip ombudsmandia isertitsivik pilllugu paasissutissanik septemberip 19-iani piumasimavoq. Paasissutissat taakku juunip 13-iani, tassalu qaammatit qulingiluat qaangiuttullu aatsaat apuupput.
Paasissutissat qaammatini arlalinni utaqqineqarnerannut Politimestereqarfimmi suliat suliarineqartarnerisa sivisussusaat apeqqutaasimavoq. Tasiilamit novemberip 28-anili oqaaseqaammik pisoqarsimavoq, oqaaseqaallu Danmarkimi pinerluttunut isumaginnittoqarfimmi inatsisinut atortitsinermut ministereqarfiup ataaniittumut apriilip aallartinnerani aatsaat ingerlateqqinneqareerluni ombudsmandimut apuunneqarpoq.
Politimesterip tullersortaa Morten Nielsen politimestereqarfimmi suliamik tigumminnittuusimavoq. Morten Nielsen Radioaviisimut oqarpoq, paasissutissanik ingerlatitseqqiinnginnermini tigusarinnittarsimanerit paasissutissallu allat suliareqqaartariaqarsimallugit, sukkanerusumilli sulisinnaanerminik oqaaseqarumanngilaq. Aamma ombudsmandip akuliunneranut uumitsaassisoqarsimaneranik sivisuumik suliarinnissimaneq tunngaveqannginnerarpaa.
- Ombudsmandip misissuiffigisinnaammatigut tamakkiisumik akueraarput, avataani inissisimasumit misissuiffigineqarsinnaanerput pissusissamisuuginnarpoq, Morten Nielsen Radioaviisimut oqarpoq.
