Paasisitsiniaanissaarsuaq aallartippaat
Oqartussaasut arlaleriarlutik isumaqarsimagaluarput tuberkulose kiisami nungutinneqarsimasoq, kisiannili taamaanngilaq. Ineqarnikkut pissutsit ajortut kiisalu Iqaluit inuisa affaasa pujortartarnerat imigassamik atornerluinermik akullugu tuberkulose siaruaatsikkiartorpaat.
Taamaakkaluartoq Leona Aglukkaq Canadap peqqinnissamut ministeria nammineq Nunavumeersoq oqarpoq:
- Tuberkulose inuiaqatigiinnut aseruisuulluinnarpoq, anguniagaraarput tuberkulosep unitsinneqarnissa, Leona Aglukkaq oqarpoq.
Canadami naalakkersuisut paasisitsiniaanissamut taaguuteqartumut TAIMA-mut 4 millionit koruuninik tapiissuteqareerput.
Paasisitsiniaanerup inuusuttunut anngunnissaa pingaartinneqarpoq, taamaattumillu tusagassiuutit nutaat paasisitsiniaanermi atorneqassapput. Assersuutitut taaneqarsinnaapput Facebook kiisalu filmi YouTubemut ilineqartussaq.
