Paasisitsiniaanerit Qasigiannguani unnugu aallartinneqassapput

Qasigiannguanilu borgmesteriusimasup, Kâlêrak' Heilmannip, kommuunerujussuup aningaasarsiornikkut tamakkiisumik periarfissai paasisitsiniaanermi eqqartorneqarumaartut neriuutigaa:

- Pisut sukkasuumik allanngoriartornerat qaangiinnarneqarsinnaanngitsutut isumaqarfigaara. Tassalu piffissami kingullermi, soorlu suliffissualiorniartut Aappilattumi, taavalu aamma Avanersuarmi qalerallit nassaarineqarlutik imaluunniit aalisarneq ilikkariartorneqarluni aamma piffissami sivikitsumi 30 tonsit angullugit qalluinerit, Kâlêrak' Heilmann, 1997-imit 2001-imut Qasigiannguani borgmesteriusoq, oqarpoq.

Tassalu kommunerujussuaq ataasiuinnassagaluarpat taakkua aningaasarsiornikkut iluaqutaaqataasinnaasut Kâlêrak' Heilmannip tikkuarpaa.

Innuttaasunik ataatsimiisitsinermi Qaasuitsup Kommuniani kommunalbestyrelsimut Qasigiannguanit qinikkat marluk, Jess Svane Siumumeersoq aamma Jens Vetterlain Inuit Ataqatigiinnersoq, saqqummiussissapput:

- Massakkullu tassa suliarisimasagut, ukiuni kingullerni sisamani ikaarsaariarfiup ukiuini, qanoq ingerlasimanerput, suut ajorpat? Suut ajunngillat? Taakkua oqaluttuariniartussaavagut. Kisianni pingaartorujussuuvoq innuttaasut namminneq anersaaruluutaat nassuiarsinnaaneri taamatut ataatsimiisitsinermi, Siumut sinnerlugu Qasigiannguani innuttaasunut paasisitsiniaasussaq, Jess Svane, aamma ullumikkut borgmesterip tullersortaatut inissisimasoq oqarpoq.

Inuit Ataqatigiit kommuunerujussuup ataannarnissaanut kisiartaallutik kommunalbestyrelsimi inissisimapput:

- Tassa saqqummiussassagut arlaqarput. Tassa innuttaasut qanimut amigaatigimmassuk sullinneqarnertik eqartoq. Siullermik aallartinnikuuvoq kommuuni aningaasaateqarani, allaat 53 millioninik akiitsoqarluni. Massakkut tamakku anigorsimavagut. Akiitsoqaratalu massakkut ingerlalerluta ukiumi 2014-imi. Taava tassa aatsaat nukissaqaleraluarluta ingerlaqqinnissatsinnut, Jens Vetterlain Inuit Ataqatigiit sinnerlugit Qasigiannguani paasisitsiniaaqataasussaq taama oqarpoq.

Eqqartugassarpassuaqassappallumi:

- Tassa uanga una soqutigiuaannartuugakku avinneqassaguni qanoq avinneqassua? Aammalu aningaasarsiorneq ullumikkut killiffipput qanoq isikkoqarpa? Taakkua assut paaserusussuakka, Kâlêrak' Heilmann oqarpoq. 

Taassuma kommunip avinneqarnissaa imaluunniit avinneqannginnissaa pillugu paasisitsiniaanissami inuussutissarsiornikkut kommunip ullumikkut tamakkiisumik inissisimanera paasisitsiniaanermi qaqilerneqarnissaa kissaatiginartippaa:

- Tassa tamakkua tamaasa nalilersuutigalugit avinneqarnissaa avinneqannginnissaaluunniit isumaqarpunga isummersuutigineqartariaqartoq, Kâlêrak' Heilmann oqarpoq.

Qasigiannguani innuttaasunik ataatsimiisitsineq Efterskole Villads Villadsenimi nalunaaqutaq arfineq marlunit aallartinneqassaaq.