Paasisitsiniaaneq Qujanaq aallartinneqarpoq
![](/sites/default/files/styles/image_934x467/public/article_images/kim_kielsen_qujanaq.jpg?itok=y3eEl0ZY)
Naqqup qeqqanut eqqaavik qorsuk inissinneqarsimavoq, eqqaaviit assigiit sisamat kommuuninut nassiussorneqassapput, ammaraannilu Julie Berthelsen erinarsorpaluttarpoq.
-Suliniutit assigiinngitsut takutinniarlugit eqqaaviit sisamat kommuuninut agguataarneqassapput, Kim Kielsen oqarpoq.
Kim Kielsen aamma oqarpoq paasisitsiniaanerup taaguutaa Qujanaq eqqarsaatigilluagaasimasoq, nangartaarpaluttumik oqarnani tamatumuuna eqqaaviup atorneranut qujanermik imaqassasoq pingaartinneqarsimavoq. Ukiut siuliinut naleqqiullugu maanna allaanerulaamik periuseqarusussimallutik oqarpoq.
-Assigiinngitsunik ujartuisaqattaartariaqarpugut, periutsinik nutaanik nassaarniarluta. Iliuuserisartakkatta qanoq iliornikkut sunniuteqarnerusinnaanerat isumaliutigisimavarput, tassanilu aamma ukiut siuliini iliuuserisimasat qissimigaarsimavavut, Kim Kielsen nassuiaavoq.
Paasisitsiniaanerup ammarneqarnerani najuuttut ilaat aamma isumasiulaarpavut:
-Isumaa torrak, oqaaseq Qujanaq atorneqartoq sakkortoqigami allamik pitsaanerusoqarsinnaanngilaq, Marco Eliassen oqarpoq.
-Inuit ilaasa eqqagassatik maangaannaq eqqaasarnerat eqqarsaatigalugu una suliniut torragivara. Meeqqat inuusuttullu matumani sunnerniarneqartut anguneqarsinnaanissaat ilimanarpoq, meeqqat ullumikkut sunut tamanut malinnaasuummata, Dora Løvstrøm oqarpoq.
Paasisitsiniaanermut atugassamik erinarsuusiortuuvoq Per Rosing. Naalakkersuisoq Kim Kielsen oqarpoq paasisitsiniaanermut atatillugu maajip 21-ani Maniitsuliassallutik, Nuummi Katuap silataani maajip 23-ani immikkut aamma aaqqissuussisoqassaaq, aaqqissuussinerni taakkunani Julie Berthelsenip tusarnaartitsinissaa naatsorsuutigineqarpoq.