Paasisimannilluartoq: Issittoq aaqqiagiinngiffiunngilaq

Pissutsit nassuiaatissaqanngitsumik ingasattajaarneqarput, taartuinnanngortillugit, uangali isumaqarpunga nunat issittut politikkikkut sillimaniarnissami eqqissisimaarfiusut, tamannalumi pissutissaqarluarpoq, tassami issittup ineriartortinneqarissaa iliuuseqarnissartillu illuatungeriit tamarmik soqutigimmassuk. Soorlu oqalugiaatinni oqareersunga, politikki eqqarsaatigalugu sillimaniarnikkut pilukattoqanngilaq.

>Akulikitsumik tusartarparput akerleriissutaalersinnaasunik pisuussuterparujussuaqartoq, taamaassorinngilat?<

> Naagga, taama oqanngilanga, tamakkuami agguataareerput, uulia gassilu eqqarsaatigissagutsigik, taamaaliortuaannarpugummi. Sianigisariaqarparpummi nunat aningaasarsiornermikkut killeqarfeqarmata, tassa imaani 200 sømilisut, taakkualu agguataareerput.

Eqqaamasariaqarpormi tamakkua sinerissap tungaani qanoq peqartigisinnaanerannik siumut missiliuussinerinaammata, taamaattumillu tamakkua avataanni piusinnaasut isumaannaallutik soorunami eqqoriaanerinnaanerusut. Eqqoriaanerilli kingulliit, takusakka najoqqutaralugit, uliap gassillu taamaallaat 3 procentiinnaa taakkua agguataarneqareersimasut avataanni pineqarsinnaassasut.

- Nunarsuarmi tusagassiorfiit ullut arlalialunnguit qaangiuttut nalunaarutigaat russit issittumi illersorniartut. Tusarliunneqarpoq Ruslandip sakkutuuni tamaannartinniarai, ilaallu isumaqarlutik sakkutuut pikkorinnersiukkat nunanut issittunukartinniarneqartut. Tamanna eqqunngilluinnarpoq, Sven Aage Christensen oqarpoq. Issittumi sorsuttarnernik taanna ilisimatusartuugami russisut oqalutarpoq, illersornissamullu periaasissaq nutaaq atuaramiuk ima oqarpoq:

- Issittumi illersornissamut pilersaarut Ruslandip suliaraa, pilersaarutilli 5/6-ia eqqarsaatigalugu sakkutuujunngitsunut, aningaasaqarnermut, teknikkikkut ilisimasatusarnermut, nunallu tamalaat suleqatigiinnerannut tunngasuulluni, taamaallaalli 1/6-ia sakkutooqarnermut, sillimaniarnermut killeqarfinnilu nakkutilliinermut tunngasuulluni. Tassa sakkutooqatigiit FSP-t atorlugit killeqarfinnik nakkutilliineq, isumaqarpungalu sakkutuunik pikkorinnersiukkanik inuit ilaasa tamanna nutsersimassagaat.