Paaqqinnittarfiliortoqarnissaa kissaatigaat
ADHD-mik Autismemillu, tassa matoqqanerujussuarmik innarluuteqartunut, Ilulissani paaqqinnittarfiliortoqarnissaa Ilulissani Inuit Ataqatigiit kissaatigaat.
- Ilulissat kommuneat illoqarfimmi paaqqinnittarfiliornissamut aningaasanik taperneqarnissamik Namminersornerullutik Oqartussanut ukiuni kingullerni qinnuteqartaraluarpoq, tamatigut ilaleqarneqarneq ajortumik, kissaatiginarpoq paaqqinnittarfiliornissaq pimoorullugu ingerlateqqinneqassasoq, ukioq aningaasaliiffiusoq 2008 siunertaralugu qinnutigineqassalluni, Ilulissani Inuit Ataqatigiit siulittaaasuat, Bendt Broberg Kristiansen, aamma borgmesterimut tullersortaasoq, taama allappoq.
Ilulissani Inuit Ataqatigiit tunngavilersuutigaat meeqqat ADHD-qartut meeqqerivinni pioreersuni immikkut ilinniartitaanngitsunit paaqqutarineqartarnerat, ilaatigullu paarlagaattorujussuarmik paaqqutarineqartarnerat.
- ADHD-qartunut Autismeqartunullu immikkut meeqqeriviliortoqariarpat, meeqqat meeqqerivinnut utaqqisut aamma ikileriassasut qularnanngilaq, Bendt Broberg Kristiansen allappoq.
- Meeqqat pineqartut angajoqqaavi januaarimi pikkorissartinneqarmata pisariaqartitsisoqarnera aatsaat taama annertutigisoq aamma takuarput, taamaattumik neriuppugut kommune Namminersornerullutillu Oqartussat tapersersuillutik suliaq ingerlateqqissagaat Bendt Broberg Kristiansen allappoq.
