Paaqqinnittarfik unioqqutitsisumik matuaat

Namminersorlutik Oqartussat tunngavissaqanngitsumik ulloq unnuarlu paaqqinnittarfimmik matusisimapput. Taama Inatsisartut Ombudsmandiat naliliivoq, Ilaqutariinnermullu Naalakkersuisoqarfiup pisussaaffini qaangerlugit iliuuseqarsiamanera isornartorsiorlugu. Aamma Tûgdlik ulloq unnuarlu paaqqinnittarfittut siorna atorunnaarsinneqarmat pisussaaffimmik qaangiisoqarsimarpasippoq.

Ulloq unnuarlu paaqqinnittarfik imminut pigisoq kalerrinneqaqqaarnani 2009-mi misissuiffigineqarmat isaasalerlugu "Forstanderi nivissallu ilaat killissamik qaangiillutik timikkut attaveqatigiittartutut" oqartussaasunit nalilerneqarpoq, tassanilu sulisut inissinneqarsimasullu oqaluttuarneri naapertorlugit forstanderiusup kamajasuunera sakkortuumillu qisuariartarnera iluarineqanngitsoq oqaatigineqarluni. Misissuinerullu kinguninnguatigut forstanderiusoq nivissamik 17-nik ukiulimmik atoqateqartarsimasutut Sana-mi Tarnip pissusaanik katsorsaavimmiit Ilaqutariinnermut naalakkersuisoqarfik nalunaarfigineqarmat iliuuseqarasuarput.

Ulloq unnuarlu paaqqinnittarfiup siulersuisuunerini siulittaasoq aqqutigalugu forstanderiusoq ingerlaannaq soraarsinneqarpoq, suliarlu politiinut suliassanngortinneqarluni.

Tamatuma kinguninngua ulloq unnuarlu paaqqinnittarfiup akuersissutaa atorunnaarsinneqarpoq, paaqqinnittarfilli nutaamik atserneqaruni, maleruagassat nutaat eqqutissagunikkit, nutaamik siulersuisuuneqalissappat, minnerunngitsumillu nutaamik forstanderitaassappat akuersissummik nutaamik qinnuteqarsinnaasoq Ilaqutariinnermut Naalakkersuisoqarfimmit nalunaarfigineqarput.

Paaqqinnittarfilli namminersortuummat Ilaqutariinnermut naalakkersuisoqarfik akuersissumik tunniussinissaanut pisussaatitaanngilaq. Naalakersuisoqarfimmi suleqatigiinnissamut isumaqatigiissusiorsinnaatitaaginnarpoq, naalakkersuisoqarfiullu isumaa malillugu isumaqatigiissut naammassineqarsinnaanngippat taamaallaat atorunnaarsiinnarsinnaavaat.

- Tassa ulloq unnuarlu paaqqinnittarfik suliffeqarfittut namminersortutut pilersinneqarsimammat Ilaqutariinnermut, Ilageeqarnermut Naligiissitaanissamullu Naalakkersuisoqarfik inatsisit naapertorlugit matusisinnaatitaanngilaq, suliffeqarfimmilluunniit arsaarinnissinnaatitaanani, inatsisartuni ombudsmandi taama allappoq.

Aamma ulloq unnuarlu paaqqinnittarfimmut tunngatillugu ingerlatsinissamut isumaqatigiissummik pilersitsisoqarnikuunnginnera ombudsmandip isornartoqartippaa, aatsaammi taamatut isumaqatigiissusiortoqarsimaguni ulloq unnuarlu paaqqinnittarfik maleruagassat malillugit akuerineqarsinnaammat.

Ulloq unnuarlu paaqqinnittarfimmut Tûgdlimmut maanna matusaaqqasumut tunngatillugu ombudsmandi assigusumik ajornartorsiuteqarpoq, taannami namminersorluni suliffeqarfittut ingerlanneqaraluarpoq.

Ombudsmandip Tûgdlimmut tunngasumik suliaqarnera siorna aallartippoq, Namminersorlutimmi Oqartussat Tûgdliup ulloq unnuarlu paaqqinnittarfittut akuersissutaa siorna atorunnaarsimmassulli piginnittua naammagittaalliuuteqarmat suliaq aallartinneqarpoq.

Aamma Inatsisartut ombudsmandiata Vera Leth-ip suliani marluk ilumut assigiissuteqarneri oqaatigai Tûgdlimulli tunngatillugu suliaq suli ingerlanneqarmat annertunerusumik oqaaseqarfigiumanagu.

Tassa massakkutut isikkoqartillugu Namminersorlutik oqartussat Tûgdlik atorunnaarsitsimmata pisussaaffimminnik qaangiisoqarsimarpasippoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat