Paamiut mittarfittaartinneqarusukkunnaarpoq
Angallanneq pillugu ingerlatsinermik inatsisartut angallannermut naalakkersuisumit Jens Napaattuumit ippassaq nassuiaassiffigineqarmata Paamiut pilliutigineqaqqippoq.
Paamiut suluusalinnut mittarfittaarnissaa kiisa ilimanarunnaavippoq, angallannermut naalakkersuisup Jens Napaattuup nunatsinni siunissami timmisartukkut angallannerulernissaq pillugu nassuiaanermini Paamiut mittarfissaata tungaanut aqquserngup suliareqqinnissaanut aningaasaliissutit tamavimmik peerneqartut oqaatigimmagu.
Paamiut Borgmesteriata Lars Sørensenip naalakkersuisut sooq aningaasaliissutit peerneqarsimanersut nassuiaateqartariaqartut isumaqarpoq.
Partiit ilaannaasa inatsisartuni ippassaq angallanneq pillugu nassuiaanermut oqaaseqaateqarmata Paamiut neriorsuutigineqareersutut mittarfittaartariaqartoq erseqqissaatigigaluarpaat.
Inatsisartunut qinigaaffinni kingullerni arlalinni Paamiut suluusalinnut mittarfittaarnissaat neriorsuutigineqartaraluarpoq kinguneqanngisaannarlunili. Illoqarfiit arfineq-marluk mittarfittaarnissaannut pilersaarummut Paamiut ilaagaluarpoq, Paamiuni mittarfittaarnissaq inatsisartunit akuersaarneqartaraluaq naalakkersuisuusartunit ukioq 2000-mili kinguartinneqaqattaalerpoq.
