Paamiuni unnuarissanik pilersitsisoqalerpoq
Aaqqissuussineq Paamiuni pissutsinut naleqqussarneqartussaq, suliniummut Paamiut Asasara-mik taaguutilimmut ilaatillugu aallartinneqassaaq, matumani siunertarineqarluni meeqqat illersorneqarnissaat ilaqutariillu meerartallit pitsaanerusunik atugassaqartitaanissaat.
Aaqqissuussinermi Paamiut Asasara-mi assigiinngitsunik suliniuteqartoqarniartoq paasissutissiisartoq Søren P. Lyberth ilisimatitsivoq.
Taamaalilluni juulip ingerlanerani eqqumiitsuliortoq Nanni meeqqat peqatigalugit, sapaatip akunnerini marlunni illoqarfimmi pinnersaassaaq. Meeqqat atuarfiat siuarsarniarneqarpoq, soorlu atuarfiup siulersuisui pikkorissartinneqassallutik, aamma ukioq atuarfiusoq nutaaq aallartippat atuartut nerisinneqartalissapput. Suliniutigineqareersut ilaattut taaneqarsinnaapput, meeqqat qalipaallutik assilialiornermik ilinniartinneqarnerat, qitinnermik ilinniartitsineq, ilaqutariinnik ineriartortitsilluni pikkorissaaneq, aamma meeqqat inuusuttuaqqallu ornittagaani qarasaasiamik atuinissamut periarfissiineq. Tamatuma saniatigut Københavnimi Universiteti suleqatigalugu meeqqat inuusuttullu atugaat, takorluugaat kissaataallu pillugit ilisimatusarnermik suliniuteqartoqarniarpoq.