Paamiuni pinerluttorpassuit

Angut 20-nik ukiulik ajortuliortarnerpassuani pillugit Paamiut eqqartuussiviannut sassartinneqarami, ukiuni marlunni pinerluuteqarsimasunut inissiisarfimmiittussanngortitaavoq.
Allattoq Louise M. Kleemann
januaarip 19-at 2009 11:50

Angut taanna tillinniarnernut, tillitanik tuniniaaqqinnernut sakkortuumillu annersaasimanernut arlalinnut atatillugu oktobarimili tigummigallagaasoq, tallimanngormat eqqartuussaanermi kingorna Nuummi pinerluuteqarsimasunut inissiisarfimmukaanneqarpoq.

Angut inuusuttoq alla 22-nik ukiulik, 19-eriarluni pinerluttaalisitsinermut inatsisinik unioqqutitsisarsimasutut tallimanngormat tigusaavoq. Aalajangerneqarporlu februaarip ulluisa aqqaneq-aappaata tungaanut tigummigallarneqassasoq.

Angutip qaqugorpiaq eqqartuussaanissaa oqaatigineqanngilaq.

Ullut kingulliit Paamiuni politiinut ulapaarfiungaatsiarsimapput.

Angut annersarneqarsimasoq tallimanngormat unnukkut napparsimmaviliaanneqarpoq niaquumigut siggummigullu kilersitersimasoq.

Persuttaaqataasimasut politiit maannamut suli ujaaraat.

Angut alla 37-inik ukiulik aalakuualaarluni arfininngormat ullaakkut immap tungaanut eqqaassisoq, politiit aamma tigusaraat, inuillu allat inuunerannik navianartorsiortitsisimasutut unnerluussassanngortillugu. Angulli inunnik ulorianartorsiortitsisimannginnerarpoq.

Sinerissap sinnerani politeeqarfinni pigaartuusimasut eqqisisimasoqarsimasoq oqaatigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq