Paamiuni mittarfiliornissamik isumaqatigiissut, Ineqarnermut Attaveqarnermullu pisortaqarfimmi ullumi nalunaaqutaq ataatsimut atsioqatigiissutigineqassaaq.
Paamiuni mittarfissaq ukiuni arlalinni assortuussutaasimaqisoq 152 million koruunit missaanni akeqassaaq, aningaasat nunatta karsianit aaneqassallutik. Mittarfissamik sanaartortuussaaq suliffeqarfik Pihl & Søn.
Mittarfissaq 799 meterinik takissuseqartussaq aappaagu decembarimi naammassineqaruni timmisartunit suluusalinnit Dash 7-init miffigineqarsinnaalissaaq.
- Paamiuni mittarfissap sananeqalernera nuannaarutigeqaarput, mittarfeqalernermi suliffissaqartitsinissamut ineriartortitsinermullu siuarsaataassaaq, Paamiuni borgmesteri Lars Sørensen oqarpoq.