Paamiuni eqqaqqittoqarsimanngilaq

- Ippassaq unnukkulli pisoqaqqinngilaq. Suli angut pineqartoq ujaaraarput, Nuup politiivini pigaartoq Poul Petersen KNRimut oqarpoq.

43-nik ukiulik Hilmer Ibsen Christensen ippassaq unnukkut politiit tungaannut eqqarpoq angerlarsimaffimmi eqqissiviilliortoqarnerani politiit ornigutereersut tamatumalu kingorna Paamiuni politiit Nuummi politiinit ikiorserneqartariaqarsimapput.

Hilmer Ibsen Christensen politiinit ilisimaneqareersoq ippassaq eqqarnermi kingorna illoqarfik qimallugu qimaasimavoq kingullermillu takuneqarluni illoqarfiup kangia tungaani. Kingullermik takuneqarami taamaallaat aappaluttumik tujuuloqarpoq qarleqarani kamippaqaranilu.

- Ippassaq unnukkulli eqqartoqaqqissimanngilaq oqareernittullu angut pinerluuteqartoq suli ujaaraarput, Poul Petersen oqarpoq.

Ippassaq aallaasersortoqarnerani inunnik ajoqusertoqanngilaq.

Arlaannik pisoqaqqippat politiit nalunaaruteqaqqikkumaarlutik ilisimatitsipput.