Paamiuni atuartut freerneq ilinniarpaat
Birgith K. Hermansen oqarpoq skolebestyrelsemut allannikuulluni amerlasuut atisoqataaffigisaannik nangippoq oqarluni freertarneq ukiuni kingulleni ingasannerulernikuusoq. -Ullaakkut makinniartarput, oqartaraat; freerpugut immaqaluunniit friissuugunaasiit. Soqutigisaaruttutut iliartorput, freerpallaarnersuup piliaanik, Birgit K. Hermansen oqarpoq nangipporlu:
Angajulleq taanna timersortarami ajunngilaq. Ulloq angalaarujoortarput angerlarsimanngikkaangamik, immaqa pinnguarnerupput.
Atuartut angajulliit ilaat qaammatit arlaqanngitsut qaangiuppata atuarunnaarlutik ilinniagaqarfigerusutatik aallartissinnaassaneraat pissangassutigineqarpoq.
-Kissaatigerusunnarpoq angajullernut friinnginnissaq anguniarneqartassasoq, ukua ilinniagaqalernissaminnut qanipput, taavalu naggataalerlutik. Annilaagagivara uanga taamatut freerpallaarnerup kingunerisaanik ilinniaqqinnissamut piumasaqaatit angunngitsoorsinnaanerat, Birgith K. Hermansen oqarpoq.
Paamiuni ilinniartitsisutut atorfinni 30-ni qulit inuttalerneqarnikuunngillat, taartaasinnaasullu amigaatigineqarlutik.
Atuarfik Tuiisami pisortaq, Najârak´ Petersen oqarpoq siunissami ilinniartitsisut qaangiuttoortittalertariaqassasut, ilinniartitsisullumi ilaat qaangiuttoortarusukkaluartut sulipilutsinnginnissaat aamma eqqumaffigisariaqartoq.
Paamiuni atuarfimmi pisortat ilinniartitsisullu angajoqqaanit isornartorsiorneqanngillat akerlianilli pisinnaasartik tamaat tunniusimallutik sulinerat nersualaarneqarluni.
Kommunemili inatsisartunilu politikerit qanoq iliuuseqarnissaat ujartorneqarpoq, taakkuami meeqqat ilinniartitaanissaat akisussaaffigimmassuk.
Paamiuni Meeqqat inuusuttut, kulturilu pillugit allaffeqarfimmi pisortaq, Tove Sørensen oqarpoq angajoqqaat isumakuluutaat paasisinnaallugu isumaqarporli arlerivallaarnissamut pissutissaqasorinngikkini.
- Pisinnaasannguarput tamaat ilinniartitsisutut taartaasinnaasunik piniartuaraluarpugut, illoqarfittulli Paamiutut mikitigisumiilluni taartaasinnaasunik piginnaaneqarluartunik nassaaruminaappoq, Tove Sørensen oqarpoq. Tove Sørensen aamma oqarpoq kisitsisit paasissutissat pigunigit ajornartorsiutip nalilerneqarnissaa isumagiumaarini.
