Ozoni aatsaat taama innarlerneqartigaaq
Ozonip putua 2 million kvadratkilometerit missaannik annertussuseqarpoq, taamalu Nunatsinnit minnerulaarluni. Nalunaarusiaq atuagassiami Naturemi ippassaq saqqummiunneqartoq tunngavigalugu, aviisimi The International Business Timesimi taama allaaserinnittoqarpoq.
Taamatut ilisimatusarluni misissuinermi ilisimatuut nunani assigiinngitsuni qulingiluaneersut peqataapput, taakkulu ozonimi putut Sikuiuitsumi Kujallermi 1980-imili naammattoorneqartarsimasut sanilliussorpaat.
Ilisimatuut Sikuiuitsup Avannarliup qulaani ozonip sooq taama annikilliartortiginera, ukiuni tulliuttuni paasiniarniarpaat:
- Sooq taama pisoqarnersoq paasiniarlugu ukiuni arlalinni sukumiisumik misissuisoqartariaqarpoq, taamaattorli Sikuiuitsumi Avannarlermi decembarimit apriilimut kipissanani issittorujussuuvoq, tamannalu siornatigut naammattoorsimanngisaannarparput, taama oqarpoq Michelle Santee, ozonip putuanik qaammataasatigut misissuisunut ilaasoq.
Tamannalu soqutiginarpoq, tassami ilisimatuut oqaatigaat, sila issitsillugu silaannarmi sananeqaatit allanngornerisigut ozoni milliartortinneqalersartoq.