8700-nit ikinnerunngitsut Tyrkiami Syriamilu nunap sajunnerani ajunaartut
Annaassiniartartut annassimasinnaasunik qarmakuni suli ujaasipput, inuillu 8700-t ajunaarsimasutut pingasunngornermi nalunaarsorneqarsimapput. Tyrkiap kujasissortaani nuna ataasinngornermi ullaassakkut sajorujussuarpoq.
Oqartussat annaassiniartartullu kisitsisaataasa tamanna takutippaa.
Inuit 6234-t Tyrkiami ajunaarsimapput, 2470-illu Syriami ajunaarsimallutik. Katillugit 8704-t ajunaarsimapput, amerliartornissaalli aarleqqutigineqarpoq.
AAMMA ATUARUK 5000-nit ikinnerunngitsut Tyrkiami nunap sajorujussuarnerani ajunaartut
Tyrkiami inuit amerlanerit suli sinnguttut Tyrkiami Syriamilu nuna ullaassakkut nalunaaqutaq sisamat qaangerlugu tanneq pingasut missaanni sajorujussuarpoq, Richterilu nunap sajuttarneranik uuttuutaa naapertorlugu 7,8-mik sajulluni. Nuna kingorna sakkortuumik aamma sajuttaqattaarpoq.
Tyrkiami illoqarfiit Gaziantepip Osmaniyellu akornanni nuna 17,9 kilometeritut ititigisumi sajuppoq.
Nunap sajunnerata kingorna illuni nakkaannikuni annassimasinnaasunik ujaasinermi piffissaasuasoqalersoq, Naalagaaffiiit Peqatigiit peqqinnissakkut suleqatigiiffiata WHO-p qullersaa Tedros Adhanom Ghebreyesus oqarpoq.