Ove Karl parteeqataasa appisaluuppaat

Uuliamik ujarlerluni qillerinerit eqqarsaatigalugit Aatsitassanut Naalakkersuisoq, Ove Karl Berthelsen parteeqatiminit isornartorsiorneqarpoq.
juunip 08-at 2011 16:45

Aasaq manna uuliamik ujaasilluni qillerinerit eqqarsaatigalugit, Naalakkersuisut inuiaqatigiinnut paasissutissiisarnerat naammaginanngitsoq aamma qillerinerup nalaani suut eqqortuunersut eqqortuunnginnersullu paasiuminaatsillugit, Naaja Nathanielsenip apeqqutit 26-t Naalakkersuisunut nassiuppai.

Inuit Ataqatigiit Inatsisartunut ilaasortaatitaasa Naaja Nathanielsenimut tapersiinertik ullumi Radioaviisimut oqaatigaat.

Uuliamik ujaasineq pillugu Greenpeacekkormiut Cairn Energymut isornartorsiuinerat tunngavigalugu, Inatsisartuni IA sinnerlugu ilaasortap, Naaja Nathanielsenip apeqqutit 26-nit ikinnerunngitsut Naalakkersuisunut akisassanngortippai. Ilaatigut apeqqutigai, sooq paasissutissanik Naalakkersuisut saqqummiusserusunnginnersut aamma kemikaaliat aappaluttunik taaneqartartut tonsit qassit ukioq manna maangaannartinneqassanersut.

Naaja Nathanielsenip apeqqutaanut parteeqataa aamma IA-p Inatsisartuni politikkikkut oqaaseqartartuata tulliata, Juliane Henningsenip, isumaqataalluni tapersiinini ersersippaa:

- Inuiaqatigiit akornanni paasisaqarusuttut amerlassusaat eqqarsaatigalugit ajunngilluinnarpoq taama apeqquteqarsimammat. Uangalu isumaqarpunga suut eqqortuusut eqqunngitsuusullu paasineqartariaqartut.

Juliane Henningsen isumaqarpoq uuliasiorneq pillugu paasisitsiniaanerni Naalakkersuisut pikkorippallaarsimanngitsut:

- Inuiaqatigiit siunissami paasitilluarnissaat pisariaqarpoq. Uuliasiornerup inuiaqatigiinnut qanoq sunniuteqarsinnaanera pitsaanerusumik aamma paasissutissiissutigineqartariaqarluni.

Paasisitsiniaanerni oqallinnerni Greenpeace  iluaqutaasumik tapersiisimasoq, Juliane Henningsen oqarpoq:

- Isumaqarpunga Greenpeacekkormiut qanoq iliuuseqarnerat iluaqutaasoq aamma susoqarneranik paasissutissiilluartoq, naak Kalaallinut taakku ajortumik kingunilimmik sunniuteqartumik iliuuseqarsimagaluartut, isumaqarpunga uangut aamma paaserusutaqarutta noqinnata taamaaliorsinnaatitaalluta, Juliane Henningsen oqarpoq.

Inuit Ataqatigiit Inatsisartunut ilaasortaatitaata Olga P. Berthelsenip isumaqataanini aamma ersersippaa:

- Naaja Nathanielsen isumaqatigilluinnarpara. Nunatsinni innuttaasut apeqqutinut taamaattunut akineqarnissartik pisinnaatitaaffigaat, Olga P. Berthelsen oqarpoq.