Ove Karl: Greenpeacep nunatta aningaasarsiornera innarlerniarsaraa
Qilleriutaatigaluni umiarsuaq Leiv Eiriksson maanna Atammiup avataaniippoq 200 kilometerit angullugit avasitsigisumiilluni, taannalu suli avasinnerusumut ingerlaarpoq, taasamut Lady Franklinimut qillerivissaminu
Inuussutissarsiornermut aatsitassanullu Naalakkersuisoq , Ove Karl Berthelsen, Greenpeacekkormiut qanoq iliuuseqarnerat tusarliunneqariitsiartoq tusagassiutinut nalunaarpoq.
- Greenpeacep uuliasiornianut akornusersuiniarneri akuersaarneqarsinnaanngillat, tassami nunat ineriartorniarsarisut inatsisitigut akuerisaasumik aningaasarsiornerminnik ineriartornissaannik aammalu periarfissaannik pilliutiginninneruvoq ajuallannartoq, Aatsitassanut Naalakkersuisoq Ove Karl Berthelsen KNR-imut taama oqarpoq.
- Inuiattut aammalu maani issittumi najugaqartutut aningaasarsiornikkut ineriartornissatsinnut aqqutissatsinnik iliuuseqarnerput aammalu nunap Naalakkersuisuisa akuerisaanik uuliasiorniarmut akuersissummik tunisisimanerput tunngavilugu taama akornusersuisoqarnera akuerineqarsinnaanngilaq, Ove Karl Berthelsen oqarpoq.
Taanna isumaqarnerarpoq Greenpeacep iliuuseqarnermigut Kalaallit Nunaata aningaasarsiornikkut siuariartorniarnera killilersoraa.
- Greenpeace inatsisit atuuttut ataqqequllugit kaammattorparput aammalu aningaasarsiornikkut siuarsaaniarnermut ataqqequllugu. Inatsit malikkunikkit maaniissinnaapput taamaappat akerlianik isumaqassaagut, Ove Karl Berthelsen oqarpoq.
Taanna aamma isumaqarpoq Greenpeace iliuuseqarnermigut innimiilliortoq inuit inuunerat ulorianartorsiortillugu tusagassiutinit malugineqarnissaq piinnarlugu.
- Greenpeace-kkormiut maanna qanoq iliuuserisaat soorunami politiinut aammalu sakkutuunut nalunaarutigineqassaaq, taakkulu inatsisinik malitsitsisussaagamik qanoq iliuuseqarfigineqassanersut namminneq aalajangissavaat, Aatsitassanut Naalakkersuisoq Ove Karl Berthelsen taama KNR-imut ualisoq oqarpoq.
Leiv Eiriksson aningaasarsiornikkut killeqarfimmik taaneqartartumiippoq tassaniitillugillu nunatsinni politiit akuliussinnaanngillat. Aatsaat uuliasiornissaminni sillimaniarnermut killeqarfiup iluaniilerpata politiit akuliussinnaapput pinerluttaalisitsinermut inatsit unioqqutinneqarsimassappat.
