Outfitterit ernumapput

Nunatsinni sinersortaatit ingerlaannarnissaasa nalornissutaanerat, namminersorluni takornarianik angallassisartup unittuussutaanissaa aarleqqutigaa.

Jørgine Frederiksen ukiuni arfineq-pingasuni Narsarsuup Qassiarsuullu eqqaani savaateqarfimmi takornarianik angallassinermik, tassa outfitteritut suliaqartuuvoq. Jørgine Frederiksen isumaqarpoq, umiarsuit sinersortaatit sinerissami ingerlaarunnaassagaluarpata takornariaqarnermut assut innarliisoqassasoq.

- Sinersortaatit peerneqarpata, takornariat tikisinnissaannut akit qaffariarujussuassapput soorunami takornariaqarneq appassammat. Taava uagut takornarianik angallassisartut akilersinnaasumik ingerlanissarput killeqartorujussuanngussaaq. Allaat oqarsinnaavunga, immaqa pitsaanerussaaq outfitteritut ingerlatsineq unitsiinnaraanni, Jørgine Frederiksen oqarpoq.

Jørgine Frederiksen oqarpoq, siorna ukiumut takornariat 150-t missaat Vandrehjemmeminni unnuisissimagitsik, ulluinnarnilu takornariat 1000-t missaat aqqusaartarsimasut. Jørginelu isumaqarpoq, umiarsuit sinersortaatit atorunnaaraluarpata takornariat imminnut tikittartut affaannanngorsinnaasut. Jørgine Frederiksenip tupaatigalugulu uggoraa, outfittereqarnermi ajunngitsumik ingerlasoqaleruttornerani taama aaqqiinialersaartoqarnera.

- Kialluunniit naatsorsorsinnaavaa, taamatut aalajangerneq kukkunerusoq, Jørgine Frederiksen oqarpoq.

Inuussutissarsiornermut Nunalerinermullu Naalakkersuisoq Johan Lund Olsen ulluni makkunani Danmarkimi Takornariartitsisarfiit ussassaarinerinut peqataavoq, taannalu tamanna pillugu ima akissuteqarpoq.

- Nuannerpallaanngilaq, kisianni ukiut kingulliit taamatut pisoqartuartarnikuuvoq. Assersuutigalugu, Air Greenlandip ukiuni tulliuttunut arlalinnut pilersaarutit, kingusissorujussuakkut saqqummiuttarnikuuaat. Taamaammat nunatsinni tamanna takornartaanngilaq, kisianni assut ajuusaarnarpoq, maani nittarsaassinersuarmi erseqqissumik oqartoqarsinnaanngimmat, Johan Lund Olsen oqarpoq.