Otto Steenholdt: Naalakkersuisut kalaallinut utoqqatsertariaqarput
![](/sites/default/files/styles/image_934x467/public/article_images/otto_steenholdt_fra_www.gh.gl_02.jpg?itok=fihtkQCB)
Otto Steenholdt isumaqarpoq, kukkunerusoq oqassalluni, kalaallit meerartaasa ilinniagaqareernermikkut Nunatsinnut angerlarnissaat Danmarkimi naalakkersuisut akornusersorsimagaat.
Tamatuma akerlianik Kalaallit Nunaat suliap ingerlanneqarneranut pisooqataalluinnartoq isumaqarpoq.
- Kalaaliaqqat taamanikkut Danmarkiliartinneqarnerat, Kalaallit Nunaanni Landsrådimit akuerineqarpoq. Nunatsinni ullumikkut naalakkersuisut, Danmarkimi ullumikkut naalakkersuisut talerperliuniartuusut utoqqatsernissaat kissaatigaat. Danmarkimi naalakkersuisut ullumikkut saamerliunianeersuugaluarpata taama piumasaqarnavianngikkaluarput. Utoqqatsertoqassappat taamanikkut Landsrådiusut sinnerlugit kalaallit naalakkersuisui kalaallinut utoqqatsertariaqarput, Otto Steenholdt Danmarkimi aviisimut atuartartutut allakkamini taama allappoq.
Otto Steenholdt isumaqarpoq, kalaallit politikeriisa inuiaqatigiinni ullumikkut ajornartorsiutit aalluttariaqaraat, siornatigut pisimasut isiginiarunnaarlugit.
- Kalaallit Danmarkimi ilinniagaqareernermikkut Danmarkimiiginnartarnerat pinngitsaalillugillu Nunatsinnut nuutsinneqarsinnaannginnerat ullumikkut ajornartorsiutaavoq. Nunatsinni naalakkersuisut suliassat pingaarutillit ilungersunarnerusullu aalluttariaqarpaat, pereersunut isiginiaannarnatik, Otto Steenholdt allappoq.