Otto Steenholdt 80-inik ukioqarluni toquvoq
Tamanna Inatsisartut siulittaasuata, Lars Emil Johansenip, Inatsisartut ataatsimiinneranni nalunaarutigaa.
Otto Steenholdt 1936-imi nunaqarfimmi Qeqertarsuatsiami maanna inuerussimasumi inunngorpoq piniartukkormiunit kingoqqisuulluni. Politikkeritut piniartukkormiunik pingaartitsisutut ilisimaneqarpoq.
Politikkerinngoqqaarami 1971-imiit 1979-imut landrådimi ilaasortaasimavoq. 1979-imiillu 2002-mut Inatsisartuni ilaasortaasimalluni.
Otto Steenholdt aamma Folketingimi 1977-imit 1998-imut Atassut sinnerlugu ilaasortaanikuuvoq, 1999-imilu attaviitsunngorluni.
Otto Steenholdt Namminersornerullutik Oqartussaasimasut Nersornaataannik sølviusumik guldiusumillu nersornaaserneqarnikuuvoq. Taakku saniatigut Dronningip nersornaasiuttagaanik aamma nersornaaserneqarnikuulluni.