Otto Jeremiassen Siumut: taasissussisarsimasut politiinit mississorneqarlik
Demokraatit allatut isumaqarput, Jens B Frederiksen oqarpoq taasissussisarsimasut pineqaatissinneqarnissaannut inatsimmik periarfissaqanngitsoq.
Otto Jeremiassen ima oqarpoq.
Inatsisartut inatsisaanni 1988-imeersumi allaqqavoq, taasissussisoqartoqarsinnaanngitsoq, tassalu toorsissussisoqarsinnaanngilaq isumaqarpungalu suliassaq politiit tigusariaqaraat, Siumut sinnerlugu inatsisartuni ilaasortaq Otto Jeremiassen oqarpoq. Politiit nammineerlutik pinerluttulerisutut inatsisit unioqqutinneqartoq tunngavigalugu misissortariarpaat, unioqqutitsinermi pineqaatissiissut sorleq atorniarnerlugu.
Otto Jeremiassen isumaqarpoq, inatsisartunut ilaasortat ilaasortaqatiminnik taasissussisarsimasut inatsisartunit ilaasortaanerminnik tunuartariaqartut. “
Inatsisartuni ilaasortat taasissussisarsimasut inuiaqatigiit akornanni sivitsortumik, qaangerneqarsinnaanngitsutut ittumik toqqissisimanngissutigineqarput, taamaattumillu allanik qanoq iliuuseqartoqarnissaq utaqqinagu, namminneerlutik tunuarniuteqarnissaat Otto Jeremiassenip kissaatiginartippaa.
Inatsisartunut ilaasortat ilaasortaqatiminnik taasissussisarsimasut inatsitigut pineqaatissinneqarnissamik periarfissaqartinneqartuuppata, taasissussisarsimasut kinguneqartinneqarsimassagluarput, Demokraatit sinnerlugit inatsisartuni ilaasortaq Jens B. Frederiksen oqarpoq. “kisianni inatsisitigut tamanna periarfissaqanngilaq, soorunami uagut inatsisit malittussaavarput, inatsisaatsunut, taamaammat periarfissaqarpat aatsaat inatsisartunut ilaasortat ilaasortaqatigisaminnik taasissussisarsimasut inatsisitigut pineqaatissinneqarnissaannik periarfissaqarpat taamaaliortoqarsimassagaluarpoq, kisiannili taamaanngimmat inatsisit ataqqillugit malittariaqarpagut , Jens B. Frederiksen Demokraatit sinnerlugit inatsisartuni ilaasortaq oqarpoq.
