Oslomi qaartartumeerisoqarpoq

Qaartitsineq Norgep Naalakkersuisoqarfiata eqqannguani pivoq, ministeriuinerup, Jens Stoltenbergip allaffiata eqqaani. Illorsuaq ajoqusersimaqisoq tusagassiorfinnit nalunaarutigineqarpoq, igalaat aseruatitersimallutik.

Norgemi politiit nalunaarutigaat qaartitsinermi inuit arlallit toqutaasimasut aqqunartitersimallutillu.

Qaartistinermi Naalakkersuisut illorsuata ilarujussua ajoqusersimasoq oqaatigineqarpoq, tassaniittut inuit ikinnerpaamik arfineq pingasut aqqunartitersimallutik. Ministeriunerup, Jens Stoltenbergip politikkikkut siunnersortaata, Sindre Fossumip oqaatigaa ministeriuneq ajunngitsoq.

Qaartitsinermi takunnittut ilaat oqaluttuarpoq, illorsuup 17-inik quleriaallit igalaavi tamarluinnarmik aserorsimasut, illorsuullu quleriiaavisa ilaat ataaseq sequmminneqarsimaqasoq oqaatigalugu, nittartagaq ag.no. allappoq.

Jens Stoltenbergip allaffia aserorsimaqimmat akimut illuatungaa takuneqarsinnaasimavoq. Qaartitsinermi ministeriunerup allaffia kisimi aseruatitersimanngilaq illorsuit taassuma eqqaaniittut, ilaatigut uuliasiorneq pillugu ministereqqarfik aamma aseruatitersimaqisoq aviisip ullormut saqqummersartut allaaseraa. Uuliasiorneq pillugu ministereqarfik ikuallattoq nutaarsiassaqartitsiviup CNN-ip aallakaatitsinermini oqaluttuaraa.

Qaarnermut, Nunatsinni nalunaaqutaq aqqaneq marlunut qiteqquttoq pisumut, suna pissutaanersoq suli ilisimaneqanngilaq. Kisianni biili aserorsimasoq, illorsuit arlaata silataniippoq.
Takunnittut oqarput, biili taana qaarnermut peqqutaarpasittoq.

- Qaarfiusoq politiit assiaqutsersorpaat, politiillu biiliisa nilliatitsissutaat illoqarfimmi tamani tusarsaapput, inuillu paasiniaallutik allaffinniit aniallutik, tusagasiortoq Norgimiu Henrik Pryser Libell Ritzau-mut oqarpoq.

Inuit aqqusinerni qissattut, Norgimi TV2 ilisimatitsivoq, aviisilu nittattakkakkut saqqummersartoq, vg.no inunnik ikilersimasunik takunnissimaneraasunik oqaluttuarluni.
Qaarneq, Norgemi politiit qaartartumit pisoq uppernarsarpaat, danskillu isertortumik paasiniaasartui, PET, aalajangerput, Norgemiut Danmarkimi pigisaannik paarsineq annertusiniarlugu.

Norgemi pisut malinnaaffigeqqinnaaritik sillimanissamullu piareersimanertik sakkortusiniarlugu, PET ilisimatitsivoq.

- Pinerliisoqarsimasoq uppernarsarneqarpat, upalungaarsimaneq annertusisinnaavarput, PET-mit oqarput.

Nalunaaqutaq marlunut TV-kkut toqqaannartumik aallakaatinneqassaaq DR-imit Oslomi qaartitsineq pillugu nutaarsiassat kingulliit, ualillu ilaa aallakaatitsivigineqassalluni.