Oscarinnattut aajuku

Filmiliornerup silarsuaani nersornaasiinerit annersaat The Academy Awards, unnuaq ingerlanneqarmat Oscarinik tunioraaneq 87-ssaannik ingerlanneqarpoq.

Filmi "Birdman" soqutigineqaqaaq. Filmini pitsaanersaattut (bedste film), ilitsersuisut pitsaanersaattut (bedste instruktør) aammalu assiliinerit pitsaanersaattut (bedste fotografering) toqqarneqarpoq.

Filmi "Boyhood" ukioq manna ajugaasussatut siulittoraluarpaat. Arnanilu filmip inuttarisaa pingaannginneq (bedste kvindelige birolle) ajugaassutigaa, tassani filmiliaritittartoq Patricia Arquette oqaluttarfimmut qaqilluni Oscarinnattaani qutsatigaa.

Angutini inuttatut pingaarnertut (bedste mandlige hovedrolle) ajugaasuuvoq Eddie Redmayne "The Theory of Everthing"-mi amerikamiutut ilisimatuutut Stephen Hawkingiusaarluni inuttaanermut.
Arnanilu inuttatut pingaarnertut (bedste kvindelige hovedrolle) ajugaalluni Julianne Moore Filmimi "Still Alice"-mi puigortunngortutut inuttaalluni.

Qallunaat marluk aamma Oscarinnattunut ilaapput, Sofie Wanting Hassing aamma Christian Falkenberg Husum Filmimi "Ida"-mi ingerlatseqataanerminni ajugaaqataammata. Filmi tuluit oqaasiinik atuinngitsumik filmiliani pitsaanerpaatut (Bedste ikke-engelskprogede film) toqqagaavoq.