Osamamik toquneraaneq upperinngilaat
Osama Bin Laden toqusimanerarlugu franskit avisiata allaaserisaa Saudiarabiamiut oqartussaasuinit akerlilerneqarpoq.
- Osama Bin Ladenip toqusimanera pillugu Saudi-Arabiami kunngeqarfik nalunaarusiamik qanittukkut tigusaqanngilaq, taama Washingtonimiittoq saudiarabiamiut aallartitaqarfiat tutsiuppoq.
- Taamatut tusarliussat asuli oqalunnerupput uppernarsaatissaqanngilluinnartut, taama Saudi-Arabiamiut oqarsimanerarneqarput.
Franskit avisiata L`est Republican-ip ippassaq tusarliuppaa nalunaarusiaq naapertorlugu allassimasoqarsimasoq pinerliiniaqatigiit Al-Qaeda-kkut ittuat Osama Bin Laden tyfusimik nappaalinerminik aggustip 23-iata septemberillu sisamaata akornanni toqquteqarsimasoq.
Franskit præsedentiata Jacques Chirac-ip tusagassiaq taamaattoq upperiumanngilaa, soorluttaaq Amerikamiut, Pakistanimiut afghanistanimiullu oqartussaasuisa tamanna upperinngikkaat.
