Ortorujuup tumai atuarlugit
-Niaqornaarsummiut angutit tallimat aavartut ilaaffigaakka, taakkulu Niaqornaarsuup iluanut Ortorujuup aavartarfiannut aavartartuuummata, taavalu inunnut taakkununnga toqqaasimanera aamma tunngaveqarluni, kuussuakkut majortartut, majoqqaartut siulliit, taakkunani aavartuni akuummat, tassalu Konrad Jeremiassenimik atilik, Anda Hansen isiginnagassiamik aavartarnilersaarusiaminik taaguuteqartumik ”Ortorujuup tumai atuarlugit” ilisarititsinini taama aallarnerpaa.
1966imi Ortorujuk umiamik aavartoq Knud Udbyemit aamma Jens Rosingimit filmiliarineqarpoq, tassanngalu aamma tigulaarisoqassaaq.
-Taannalu tunngavigalugu isumassarsisimavunga taamanikkut periutsit qanoq ittuunerat ukiut arlaqanngittunnguit matuma siorna pisimasuummata taava massakkullu pissutsit qanoq ittuunerinik ersersitsiniarlunga suliarerusulersimavara, Anda Hansen oqarpoq.
Isiginnaagassiarlu Ortorujuup tumai atuarlugit minutsinik 55inik sivisussuseqartoq Iluliarmiunut Sermermiuni ataasinngorpat nalunaaqqutaq unnukkut arfineq pingasunut takuteqqaarneqartussanngorpoq. Isiginnaagassiaq Niaqornaarsummiunit takuneqaqqaartoq tiguneqarluarsimavoq.
Taamanikkut assut tigulluarneqarpoq, unnuk kultorisiorfimmi katersortarfiat ulikkaarlugu inuppassuit isiginnaariartoqarpoq. Meeqqat, inersimasut utoqqaallu. Taavalu assorsuaq tigulluarpaat, filmi naammat qummoroortartortoqarlunilu allaat, assorsuaq nuannarisimagamikku, Anda Hansen oqarpoq.
Ilulissani ataasinngorpamiit ulluni pingasuni takutitsinerit naammassippata Aamma pilersaarutaavoq Ortorujuup tumai atuarlugit Katumi 19.april aamma 20.april takutinneqassasoq.