Orsugiak pillugu piviusulersaarutip Folketingimi siunersiorneqarnerani isornartorsiuisorpassuusut

Danskit politikeriisa kultureqarnermut ministeri DR-imit piviusulersaarut 'Grønlands hvide guld' pillugu siunersiormassuk isumaat ersaripput.

Allattoq Ann-Sophie Greve Møller

marsip 18-at 2025 07:30

Nutserisoq Connie Fontain, Josefine Rasmussen

DR-imit piviusulersaarut 'Grønlands hvide guld' danskit kultureqarnermut ministeriat, Jakob Engel-Schmidt Moderatineersoq siunersiorneqarmat isornartorsiuinerit oqaaqqissaarnerillu sipaarutigineqanngillat.

Kultureqarnermut ataatsimiititaliamit, Katrine Daugaard Liberal Alliancemeersup Folketingimi sisamanngornermi siunersiuineq aallartillugu danskit tusagassiorfiat innuttaasunik kiffartuussisussaatitaasoq isornartorsiungaatsiarlugu aallartippaa.

- Danmarkip Kalaallit Nunaanni orsugiammik piiaasimaneranut tunngatillugu tunngaviviit pillugit eqqunngitsumik paasissutissiisoqarnera tusagassiornerlunnerujussuullunilu qullersat naliliinerat pitsaanngilluinnarpoq.

- Danmarkip Kalaallit Nunaanni aatsitassarsiorneq 4 milliardinik iluanaarutigisimagaa oqarneq tunngaviusumik eqqunngitsumik nutaarsiassiornerusoq oqaatigineqarsinnaavoq, tamanna Danmarkip Kalaallit Nunaannut atassuteqarneranut atatillugu ilungersuanartoqarnerani sunniiniarneruvoq, tamannalu pisumut ilungersunartorsiortitsilluinnarpoq, Katrine Daugaard oqarpoq.

Partiit talerperliit, tassa Liberal Alliancemeersut, Konservativineersut, Danmarksdemokratineersut aamma Dansk Folkepartineersut kultureqarnermut ministerimik aggersaasuupput. Ataatsimiinnermi DR-ip qullersaqarfiata akisussaaffini naammassisimaneraa aamma DR-imi tutsuiginassuseq, kiffaanngissuseq, politikkikkullu kalluunnaveersaartuuneq pillugit ajornartorsiutaajuaannarnersoq ministerimit ilaatigut akissuteqarfigineqartussaapput.

Partiit talerperliit oqarnerat naapertorlugu DR-imit piviusulersaarusiarineqarsimasorpassuit ukiuni kingullerni isornartorsiorneqartorujussuupput.

Tutsuiginassusaa innarlerneqangaatsiartoq

Piviusulersaarut, 'Grønlands hvide guld' “tusagassiornermi pipallataannaasoq” saqqummersimasariaqanngikkaluartorlu siunersiuinissamut aggersarneqartoq, Jakob Engel-Schmidt isumaqarpoq.

- DR-ip piviusulersaarusiaq peeqqippaa, aaqqissuisuuneq soraarsippaa qallunaanullu utoqqatserluni, tamannalu pissusissamisoorpoq. DR suliaq una pillugu innarlerneqangaatsiarpoq. Uannut tutsuiginassusaa allaat innarlerneqangaatsiarpoq, taanna oqarpoq.

'Grønlands hvide guld' oqallisigineqangaatsiartoq

DR-ip piviusulersaarusiaa 'Grønlands hvide guld' februaarip qulingiluaanni saqqummersinneqarmat tusagassiuutitigut oqallisaangaatsialerpoq.
Piviusulersaarusiap Ivittuuni orsugiassiorfik danskit suliffeqarfiinut danskillu aningaasaqarnerannut qanoq naleqartigisimanersoq misissuiffigaa. Tamatuma saniatigut aatsitassarsiorfik nunatsinni kalaallinut Danmarkimilu inunnut qanoq isumaqarsimanera aamma misissorneqarluni.
Piviusulersaarusiap danskit inuiaqatigiit piffissap ingerlanerani ullumikkut aningaasat nalingini 400 milliardit koruuninik iluanaarutigisimagaa saqqummiuppaa.
Danmarkimi aningaasaqarnermut ilisimatuut arlallit naatsorsueriaaseq isornartorsiorpaat, naatsorsukkallu nalinga eqqortuunersoq apeqquserlugu.
Danskit politikeriisa arlallit DR-ip piviusulersaarusiaat aamma isornartorsiorpaat, innuttaasunullu kiffartuussinermik tusagassiorfimmut kinguneqartitsisoqarnissaa piumasaralugu.
DR-ip piviusulersaarusiaq saqqumiunnaarsinniarlugu pisortarlu akisussaasoq, Thomas Falbe soraarsinniarlugu februaarimi aalajangerpaa.
Aalajangernerli taanna isornartorsiorneqarpoq ilaatigut naalakkersuisut maanna siulittaasorigallagaannit, Múte B. Egedemit aamma Nunatsinni Tusagassiuinermi Sulisut Peqatigiiffiannit.
Aningaasaqarnermut ilisimatuut aningaasaqarnermik suliaqartut allat isornartorsiuinerannik tamatuma kingorna isornartorsiuipput.

Allisiguk

Kultureqarnermulli ministerip DR-imi sulisunik soraarsitsisoqassanersoq politikerit naliliiffigisussaanngikkaat isumaqarpoq.

Piviusulersaarullu DR-mut ukiut tamaasa 4 milliardit koruunit pallillugit aningaasaliissutigineqartartunit ilanngaaffigineqarnissaanut pissutissiinngitsoq ministeri isumaqarpoq. Jakob Engel-Schmidtilli innuttaasunut kiffartuussinermik tusagassiorfiup piviusulersaarusiortarnerani allannguisoqartariaqartoq erseqqissaatigaa.

Aamma atuaruk DR isornartorsiorneqangaatsiartoq: - Ikinnerussuteqartunik avoqqaarinnilerneq killissamik qaangiineruvoq

Danmarkimi politikerit piviusulersaarut isornartorsiungaatsiaraat tamanna nunatsinni allaaneruvoq.

Naalakkersuisut siulittaasorigallagaat, Múte B. Egede piviusulersaarummi ilaasoq DR-ip orsugiak pillugu piviusulersaarummik saqqumiunnaarsitsinera isornartorsiorpaa.

- Piviusulersaarummimi saqqummiunneqartut tunngavippiaat toqqorterniarneqalerput. Tassa Danmarkip nunarput qulaalluta aningaasarsiorfigingaatsiarsimagaa, Múte B. Egede Facebookikkut allappoq.

Nunatsinni Tusagassiuinermi Sulisut Peqatigiiffiata DR-ip aalajangernera aamma akerleraa.

- TP-mi ataatsimeersuartut piviusulersaarutip ”Grønlands Hvide Guld”-ip saqqummiunneqarneranut atatillugu kingunerlutsitsinerit soraarsitsinerillu pillugit politikkikkut akuliunnerit sakkortuumik akerleraat. Akuliunneq akulerutinnginnissamik periuseqarnermik tusagassiisinnaanermillu unioqqutitsipput, tamannalu ilungersunarpoq, TP tusagassiuutinut nalunaarummi allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.