Ornittagaq nuannarineqarluartoq matoriaannaavoq

Qiperoq, københavnimi kalaallinut sammisassaqartitsiviullunilu attaveqaqatigiiffiusoq, ukiumi nutaamiit matoratarsinnaavoq, Danmarkimi Socialministereqarfimmiit aningaasaliissutaasartut ukiup tullianiit tunniunneqarnissaat qularnarmat. Qiperumi aqutsisuugallartoq Rikke Mortensen ima oqarpoq:

- Ukiup naanissaata tungaanut aningaasaliissutinik taperneqartarpugut, tamatumalu kingorna allatut aningaasalersorneqarnissarput ujartortariaqassavarput, iluatsitsinngikkuttalu matuinnaratarsinnaavugut.

Pitsaasuuvoq inunnut iluamik sulisinnaanngitsunut, taamaattorli piumassuseqartunut maanitut ittumik ornittagaqarnissaq, Rikke Mortensen oqarpoq.

Qiperoq ilaatigut sanaluttarfeqarpoq, qalipaasarfeqarluni siunnersuisarfiullunilu. Rikke Mortensenip annilaangatigaa Qiperoq matussagaluarpat atuisut atornerluisuunermut saassinnaanerat:

- Qiperoq matussagaluarpat atuisuusut namminneq piginnaasatik atorsinnaajunnaassavaat, kalaaleqatiminnillu oqaloqateqarlutillu naapitsiniarunik, taava immaqa imerniartarfiit ornittariaqassavaat, Rikke Mortensen oqarpoq.

Bent Kuitsi ullut tamaasa Qiperumukartarpoq sanaluttarfimmillu atorluaasuulluni. Taassuma Qiperoq matussagaluarpat ulluinnarni inuuneranut sunniuteqassasoq oqaatigaa.

- Ullut tamaasa isertarpara ammaqqissanngippallu arlaannut saaffissarsiortariaqassaanga sannavilinnut. Eqqortumik oqassaguma maaniinni manna nuannarinerpaavara toqqissisimanarnerpaajummat kiffaanngissuseqarnarnerullunilu, Bent Kuisti oqarpoq.