Orasilami ajunaartut inuttaaqatai ikiorneqalerput

Inuttat suli Qaqortumi umiarsuarmiipput Danmarkimulli utingajalerlutik.

Uuliamik assartuummi, Orasilami inuttaasut marluk, Saarlup eqqaani tallimanngormat ajunaarnerat paasiinnarlugu,, umiarsuarmik piginnittut, M.H. Simonsen, Svenborgimeersut, atassuteqarnermut immikkut ilisimasalik tusaamasaq, Jess Myrthu pisimasoq pillugu tusagassiuutinut atassuteqarneq tamarmi taassumap kisimi nakkutigissagaa nalunaarutigineqarpoq. Taamaammallu paasisagut tamarmik taassuma oqaasii naapertorlugit ingerlatitseqqiinerupput.

Orasilami inuttaasut ajunaartortatik qaqereerlugit Qaqortumut tikimmata tarnip nakorsaa talittarfimmi piareersimareerpoq. Inuttalli tarnip nakorsaanut saaffiginnissimanersut nalullugu, Jess Myrthu oqarpoq. Inuttaasut manna tikillugu umiarsuarmiiginnarnissartik aalajangersimavaat, Danmarkimullu utingajalerlutik. Umiarsuullu naalagaata pisimasoq assut aliagigaa, inuttaasullu ilamik ajunaarnerat namminnerlu qaqitsisimanertik aamma assut aliagigaat, Jess Myrthu oqarpoq.

Inuttat taakkua marluk uuliap aqqutaanik puttasussiamik siaarsiniarnerminni ajunaarsimanerat qanoq pisinnaasimanersoq nalullugu oqarpoq, Imarsiortunillu nakkutilliisoqarfimmit misissuinerit umiarsuaatillit utaqqimaaqqaartariaqaraat, Jess Myrthu oqarpoq.

Inuttat ajuaartut suliaminnik sungiussilluarsimasuupput, umiarsuarmilu naalagaasoq tullersortaalu tamarmik aamma suliaminnik sungiussilluarsimasuullutik. Isumannaallisaanermili malittarisassat itinerusumik oqaaseqarfigisinnaanagt, Jess Myrthu oqarpoq.

Misissugassallu pingaarnerit ilagaat sooq umiarsuaq ajunaartoqarnerata kingorna ikkarlissimasoq. Tamakkua pillugit aamma Imarsiortunik nakkutilliisoqarfiup misissuereeruni nalunarusiassaa umiarsuaatillit utaqqimaarallaqqaarniaraat, Jess Myrthu oqarpoq.

Ajunaartut marluk taakkua maanna Danmarkiliaanneqarput.

Umiarsuarmi inuttaasut politiinit ullumi apersorneqarput, qaquguli imarsiortutut killisiuisoqarnissaa suli ullulerneqanngilaq.