Orasila unnuaq kaanngartinneqarpoq
Orasilami ajutoornerit tulleriit aallartipput tallimanngormat unnukkut arfernup missaani nunaqarfimmi Saarlumi ikummatissamik maqitsiniarnermi. Ikummatissap tankersuarnut maqinneqarnerani atorneqartartoq slangersuaq puttasartoq Orasilami inuttaasut angutit marluk umiatsiaaqqamik assartorlugu kinngummata ikaanniartillugu angutit sumiiffeerunneqarput ujaasineqalerlunilu. Orasila Saarlumit 3-400 meterinik avasitsigisumiitillugu ajunaarneq siulleq pivoq.
Nalunaaquttap akunneri tallimat ujaasineqareersoq tallimanngormat unnuaqeqqanut aallartoq angutit 18-inik 47-inillu ukiullit timaat ajunaarsimasut nassaarineqarput.
Ajutoorneq tulleq pivoq Orasila Qaqortumukaarniartilluni ikkarlimmat. Ippassarlu arfininngornermi unnuap qeqqanut qiteqqukkiartortoq ulimut naammatsilivinnerani aatsaat kaanngartinneqarpoq.
Kaanngartinneqarsinnaanera qularnarsisimagaluarput, silasiortut anorersuarnissaanik ilimasaarimmata.
Orasila puttallarluarniassammat Namminersornerullutik Oqartussat akuersinerisigut ikummatissat usiisa - gasoliep, timmisartut orsussaata uuliallu - 1.764 tonsiusut ilaat gasolie 163 tonsi umiarsuarmut allamut maqinneqarpoq. Allalu timmisartut orsussaat 41 tonsi imaanut maqiinnarneqartariaqarsimalluni.
Qaqortumi qatserisartut ikummatissap avatangiisinik mingutsitsivallaannginnissaa anguniarlugu politiit umiarsuaaraat Sisak III suleqatigalugu mingutsitsiffimmut alakkaasussaagaluarput, ulloqeqqatali kingorna nalunaarput silap ajorpallaarnera pillugu alakkarneqanngiinnartoq, taama qatserisartut pisortaat Peter Erik Thomsen nalunaarpoq.
- Timmisartup orsussaa ikummatissanit allanit oqinnerugami aalannguutiasuuvoq, taamaattumik mingutsitsivallaarnavianngilaq, erseqqissaavoq.
Ajunaartut timaat Qaqortuliaanneqareerput, Orasilalu Qaqortumi umiarsialivisseqqagallassaaq Qaqortup eqqartuussiviani pisut pillugit nassuiaasoqassammat.
