Oqummik ajornartorsiut kisitsisaatigineqanngilaq

Inissiaatileqatigiiffiup Ini A/S-ip inissiaataani oqummik ajornartorsiorneq annertusiartuinnarpoq. ineqartut arlallit ullormut saaffiginnittarnerat inissiaatileqatigiiffimmut ajornartorsiortitsivoq, millionilikkaanillu akeqarluni. Taamaattoq oqummik eqqugaasartut amerlassusii inissiaatileqatigiiffimmi kisitsisaatigineqanngitsut, teknikeqarnermut pisortaq Jesper Johannesen oqarpoq:

- Toqqaannartumik kisitsisaateqanngilagut, kisianni oqaatigisinnaavara inissiat nutaannginnerit oqummik eqqugaanerpaasartut, oqummillu ajornartorsiutip toqqaannartumik iluarsiniarsarineranut nukigut atortarpagut, Jesper Johannesen oqarpoq.

Inissiat qanoq amerlatigisut oqummik ajornartorsiuteqarnersut kisitsisaatigineqalissagaluarpat, tamanna iluaqutaanavianngitsoq Jesper Johannsen oqarpoq.

- Taamaattoqassappat inissiat ataasiakkaarlugit misissortariaqalissavagut, taamaaliorsinnaanngilagulli, toqqaannartumik iluarsartuussineq suliarisarigatsigu, Jesper Johannesen oqarpoq.

Inissiap sananeqarnera, najugaqartullu namminneq iliuuseqartarnerat oquttoqartarneranut peqqutaaqataasut, Jesper Johannesen oqarpoq.

Inissiaatileqatigiiffiup INI A/S-ip nuna tamakkerlugu inissiaatai 9000-it missaanniipput. Inissiallu amerlasuut maannakkumut oqummik eqqugaareersimapput. INI A/S-ip inissiaatai siullersaallutik sananeqartut 50-ikkut naalerneranni naammassineqarput. Oquttarneralu aningaasarpassuarnik INI A/S-mut akeqartartoq, Jesper Johannesen oqarpoq:

- Tamakkiisumik aningaasat qanoq amerlatiginersut oqummut atorneqartarnersut oqaatigisinnaanngilara, kisiannili ukiumut millionilikkaat atortarpavut. Immikkoortortamiit immikkoortortamut aningaasat oqummut akiuiniarnermut atorneqartartut assigiinngitsorujussuupput, Jesper Johannesen oqarpoq.

Inissiat oqummik eqqugaasimagaangata najugaqartut allamut nuutikkallarneqanngikkunik nuutivinneqartarput, inissiap qanoq oqummik eqqugaatigisimanera apeqqutaalluni.