Oqqiffigisimasatik qimassimalerpaat
Tamatumunnga pissutaanerusut tassaapput ilaqutariit akornanni imminnut ikioqatigiittarnerit.
Juni qaammataagaa Haitimiut millionit aappaata affaanit amerlanerit oqqiffigisimasaminni assut ajortunik atugassaqarfiusuni najugaqarput. Maanna taakkunannga millionit affaat oqqiffimmi marulluit toqqillu putoortut qimassimalerpaat, taamaaliornerallu arlalinnik pissuteqarpoq. Pissutaasut ilagaat ersineq annilaanganerlu. Taama oqaluttuartuarpoq Per Dam, Haitimi Røde Korsimi ataqatigiissaarisoq.
Oqqiffinniit inuit qimagussuunnerat aamma pissuteqarsinnaavoq koleramik tunillatsinnissamut ersinermik, tamannami oqqiffiusuni peqqinnanngitsuni navianaateqarnerpaammat.
Kisianni oqqiffiit aamma qimagarneqarput sumiiffinni allani periarfissat pitsaanerummata, tassanilu Røde Kors aamma nunaannarmi ilaqutaasut annertuumik oqartussaaqataapput.
Maanna oqqiffiit avataanni inuit ikiorlugit aallartippugut, tassa oqqiffinniittut amerlanersaat nunaannarmi nunaqarfeeqqani ilaqutaqarput ikiuisinnaasunik.
- Taamaaliornikkut periarfissaqalerpugut inuppassuit oqqiffinniittut nunaannarmut nunnissaannut, qimaasut nunaannarmi ilaqutaat illoqarmata imeqarlunilu, Per Dam oqarpoq.
