Oqimaanaarineq 1980-kkunnili ajornartorsiutaavoq

Aalisarnermi oqimaanaarisoqartarneranik ajornartorsiut 1980-kkunnili ilisimaneqarpoq.

Taamanikkut Inuussutissarsiornermik Pisortaqarfeqarallarmat, ilisimatuutut taakani sulisimasoq Tyge Kjær ajornartorsiummik tamatuminnga iliuuseqarniartarsimagaluarpoq.

- Taamani KNAPK-p siulittaasorisaata oqarfigaanga, ilumoorputit, oqimaanaarisoqartarnera ajornartorsiutaavoq. Kisianni inuussutissarsiut taanna ajornartorsiuteqarfiusorujussuummat ilaatigut sallulaarsinnaasariaqartarpugut, tassa imaappoq pissusissamisuunngitsumik ingerlatsisoqarnera taassuma taamani nassuerutigivaa,

ilisimatooq Tyge Kjær radio aviisimut taama oqaluttuarpoq.

Taanna ukiut 20-t matuma siorna Namminersornerullutik Oqartussani sulitilluni oqimaanaarisoqartarneranik ajornartorsiutit nalaattarsimaqai.

- Taamanikkut tamanna ajornartorsiutaasorujussuuvoq assullu oqallisigineqartarpoq. Ilaatigut eqqartorneqartarpoq ilumut iluamik atorluaasoqavinnersoq. Aalisakkeriviillu iluamik iluanaarutaasarnersut apeqqusersorneqartarput. Taamatullu aamma aalisarnermik inuussutissarsiuteqarneq ilumut iluanaarutaasarnersoq apeqqusersorneqartarluni, Tyge Kjær taamani pisunik taama oqaluttuarpoq.

Taassuma aamma eqqartorpaa, taamanikkut eqqaasoqartarsimanera assut maluginiartarsimagitsik.

- Takusinnaasarsimavarput pisassat pisallu oqimaaqatigiinngittartut, tassami pisarineqartussat naapertuuttussaagaluit pissusissamisoorneq ajorput, raajat angisuujullutillu mikisuusartussaagaluit mikisuutitilertaramik, Tyge Kjær oqaluttuarpoq.

Ajortoqarnera paasinarsiartuinnarmat, tamatuma sunik peqquteqarsinnaanera misissuiffigisimagaluarpaattaaq.

- Taamani tamatumunnga peqqutaanerpaasut pingasuusoraagut tassaasut: Siullermik; kilisaataatillit raajanik angisuunik akisutitsisorujussuupput. Ajornartorsiullu tamanna aatsaat qaangerneqarsinnaasimavoq raajat minnerit nunami raajaleriffinnut tulaanneqartaleraluarpata.

Taavalu aappaattut:

Tamakku tamarmik allanngortiterneqassappata pisasseeriaatsikkut periutsit aamma allanngortitertariaqartussanngussallutik.

Pingajuattullu: aalisarnermi nukiit pisarisinnaasanut naleqqiullugit annertuallaarsimannguatsiarput, allanngortiterineqassappallu sinerissami aalisarfiit naleqqussarneqartussanngussallutik, Tyge Kjær 1980-kkut qiteqqunneranni pisunik taama oqaluttuarpoq.

Ilisimatooq Tyge Kjær maanna Roskildep universitetiani sulivoq, nunatsinnullu attuumassuteqarunnaarsimagami, ullutsinni unioqqutitsilluni aalisartoqarneranik nalunaarusiaq pillugu oqaaseqarsinnaanngilaq.