Oqartussat nassuiaateqaqquai
Piviusulersaarummi ippassaq takutinneqarpoq timmisartortitseqatigiiffiit namminersortut arlallit kilitsissiaqarfimmit CIA-mit pigineqarlutillu ingerlanneqartut taakkualu arlaleriarlutik Narsarsuarmut mittarsimasut. Danskit naalakkersuisuisa siullermik kilitsissiaqarfiup CIA-p timmisartuussisarnerisa arlaannaannulluunniit attuumassuteqanngitsunit misissuiffigineqarnissaat itigartissimavaat, maannali tassa ministeriuneq nassuiaaqqusivoq.
Anders:
Susoqaraluarpalluunnit paasissutissat saqqummiunneqartut nassuiarneqartussaapput.
Københavnimili amerikamiut aallartitaqarfianni oqaaseqartartoq Tom Leary piviusulersaarummut oqaasissaqarpallaanngilaq.
Tom:
Peqqarniisaarnianut akiuiniarnermut tunngasut pillugit paasissutissalluunniit taama annikitsigisut akissallugit oqaaseqarneq ajorpugut.
Akerlianilli danskit naalakkersuisuisa ministeriunerullu suliassaq imaannaanngitsorujussuartut isigaat.
Anders:
Naalakkersuisut paasissutissat saqqummiunneqartut ilungersunartutut isigaat.
Ilumulli misissuisoqassanersoq ministeriunerup suli akisinnaanngilaa.
Anders:
Siullermilli paasissutissat saqqummiunneqartut misissoqqaartariaqaerpagut, tamassumalu kingorna inerniliilluta.
Danskilli naalakkersuisuisa Amerikami oqartussaasunut attaveqarnissaminnik neriorsuineri naammanngilluinnarput. Taamatut isumaqarput Christiansborgimi illuatungiliuttut. Partiit sisamat arlaannaannulluunniit attuumassuteqanngitsut misissuinissaat piumasaqaatigaat. Danskit naalakkersuisuisa namminneerlutik nassuerutigissappassuk Danmarkip silaannartaani timmisartuussisarsimanernut uppernarsaatissaqarluartoq. Taamaattumik ilaatigut SF-imi Villy Søvndal isumaqarpoq misissuineq maannakkut aallartinneqassasoq.
Villy:
Naammanngilaq nunanut allanut ministeri USA-mi nunanut allanut ministereqarfimmut sianerpat, aperalunilu ilumut CIA Kalaallit Nunaaniit tigusanik angallassisarnersoq, akissutisillunilu, taamaaliortoqartarneranik ilisimannittoqanngitsoq. Massakkut iternga tikillugu paasiniaasoqartariaqarpoq.
Ny Alliancep siulittaasuata Naser Khaderip danskit naalakkersuisuisa USA-mik oqaluussinissaasa kingunissai takoqqaarusuppai taakkualu naammaginartuunngippata misissuinissamut naalakkersuisut avaqqullugit amerlanerussuteqartoqalersinnaalluni.
Khader:
Naalakkersuisut sunilluunniit itigartitsinngillat, isumaqarpunga ajunngitsumik iliuuseqartut, USA-mi naalakkersuisut aperaat, takoriartigu qanoq akiumaaarnersut, tassaanngaanniillu ingerlaqqilluta.
