Oqarasuaatit angallattakkat PlayStationnillu Nuuk Centerimi tillinneqarsimasut politiit takunnissimasussarsiorput
Unnuaq angutit sisamat Nuuk Centerimut nalunaaqutaq ataatsip, marlup qeqqatalu akornanni ikuallattoornermi qimaaffissiakkut tillinniarlutik isersimapput.
Jørgen Madsen Kalaallit Nunaanni politiit pigaartut pisortaat taama oqarpoq.
- Tillinniartut Kop og Kandemiillutillu Elgigantennimiissimapput.
- Elgiganten-imi oqarasuaatit angallattakkat soorlu Iphonet, Samsungillu amerlasuut tillinneqarsimapput, aammalu Ipad-it Playstationnillu tillinneqarsimallutik.
Kop og Kandemi imeruersaatinik tigooqqaasimapput taakkuli nassaarineqarsimapput, pigaartut pisortaat taama oqarpoq.
Angutit sisamat qernertunik atisallit
Suliami pinerluttut kikkuuneri suli paasineqanngillat suliarli suli misissuiffigineqarpoq.
Politiillu angutit sisamat ujaarivaat.
Angutit taakkua 15-niit 20-nut ukioqassangatinneqarput, 170-175 cm-terit akornanni angissuseqarput. Qernertumik tamarmik kavaajaqarput, tamarmillu aamma qernertunik qarleqarlutik, ujaarineqartup ataatsip kavaajaa TrapStar-imik meqqeqarpoq.
Politiit pigaartuisa pisortaat Nuuk Centerip eqqaani pasinartumik takunnittoqarsimappat Kalaallit Nunaanni politiinut saaffiginneqquneqarput.
- Imaluunniit illoqarfimmi tillitaasinnaasunik paarisunik takunnittoqarsimappat saaffiginneqquneqarput, Jørgen Madsen oqarpoq.
Nittartakkakkut attaveqaammi Facebookkimi oqarasuaatinik angallattakkanik attaveqaatinillu allanik Elgigantenimi tillitaariataarsinnaasunik tuniniaasoqassappat aamma eqqumaffigeqqunarput.
- Tuniniakkat pisiarinnginneranni akiliisimanermut uppernarsaammik takoqqaarumanissaq innersuussutigaarput, pigaartut pisortaat oqarpoq.
Politiit uunga attavigineqarsinnaapput oqarasuaat 70 14 48-mut.
