Politiit ullormut nalunaarutaat: Tillinniartoqarpoq, tillinniariaraluartoqarpoq biilinillu ikuallattoqarluni
Tillinniartoqarneranik illoqarfinniit pingasuniit ippassaq ataasinngornermi ullaakkut qulingiluanut qiteqqunnerata qulingiluatalu akornanni nalunaarutiginnittoqarpoq.
- Tassa tillinniartoqarneranik Nuummiit, Tasiilamiit Qaqortumiillu nalunaarutiginnittoqarpoq, Kalaallit Nunaanni Politiit marlunngornermut unnuaani pigaartuisa pisortaat Aputsiaq Hansen oqarpoq.
Tassa Nuummi Dronning Ingridip Napparsimmavianut tillinniartoqartoq, Tasiilami kantiinamut tillinniartoqartoq politiit pigaartuisa pisortaata ilisimatitsissutigaa, Qaqortumili sumut tillinniartoqarnersoq ilisimatitsissutiginagu. Illoqarfinnili taakkunani tillinniartut kiusimasinnaanersut ilisimanngikkitsik, taassuma ilanngullugu ilisimatitsissutigaa.
Pasisat marluk tigusarineqartut
Nuummi pisut allat marluk pillugit suliani allatut pisoqarpoq.
Tassa Nuummi Nuussuarmi tillinniartoqarneranik politiit ippassaq ataasinngornermi ualisoq nalunaarfigineqaramik tillinniarfigineqarnerartumukalertornerminni tillinniariaraluaq qaninngaarpaat.
Politiit angut ualisoq sisamanngoriitsiartoq qaninngaagartik 20-t sinnerlugit ukiuliusoq tigusarivaat.
- Angut qaninngaarneqarnermini kingorna tigusarineqartoq tillinniarsimasutut pasineqarpoq, allallu marluk tillinniariaraluarnermut tassunga attuumassuteqartutut pasineqarlutik aamma tigusarineqarput, politiit pigaartuisa pisortaat oqarpoq.
Ujajaaffigineqartoq angut aamma 20-t sinnerlugit ukiuliusoq napparsimmavimmi misissortippoq, angutillu pingasut suliami tassani pasineqarlutik unnerluutigineqartut iperagaareersut, politiit pigaartuisa pisortaat oqarpoq.
Suliamut allamut tunngatillugu nukappiaraq 18-liineqanngitsoq Nuummi Nuuk Centerimi tillinniariaraluarsimasutut pasineqartoq marlunngornermut unnuaani pingasunut qiteqqunnerata missaani tillinniariaraluarsimalluni nassuerpoq.
- Nukappiaraq taanna 15-ileereernikuummat tillinniariaraluarsimasutut pasineqarluni unnerluutigineqarpoq, 18-iliineqanngimmalli isumaginnittoqarfimmut nalunaarutigineqarpoq, politiit pigaartuisa pisortaat oqarpoq.
Qinngorpumi biilinik ikuallattoqartoq
Nuummi Qinngorpumi biilinik ippassaq ataasinngornermi unnukkut ikuallattoqartoq, politiit pigaartuisa pisortaat aamma oqarpoq.
- Qatserisartut politiillu biilimut ikuallattumut ornigutilertorput, biililli ikuallattut qatserneqalertorput ajoqusertoqarnanilu, Aputsiaq Hansen oqarpoq.
Biilit sooq ikuallannersut oqaatigisinnaannngikkini, taanna aamma oqarpoq, sumiiffinnili allani ataasinngornermiit marlunngornermut ulloq unnuarlu kingulleq ataatsimut isigalugu eqqissisimaffioqisoq aamma erseqqissaatigalugu.
