ATTAVIK 146 oqarasuaatikkut siunnersuisarfik 2009-mi 2008-mut sanilliullugu atorneqarneruvoq.
Attavik 146 siorna sianertunik 194-inik oqaloqateqarpoq, 40-t missaannik ukiup siulianut naleqqiullugit amerlanerusunik.
Attavik 146-mi siunertaavoq kinaassuseq isertuullugu inuit imminut toqunnissaminnik eqqarsartut inuttulluunniit ajornartorsiortut siunnersorneqarnissamik akeqanngitsumik neqeroorfiginissaat.
Attavik 146 aamma inuit imminut toqunnissaminnik sioorasaarisimasut qanigisaannut saaffiginnittuuvoq.
2009-mut ukiumoortumik kisitsisit ersersippaat, siunnersuilluni oqaloqateqartarnermi kiserliorneq, atornerluinermik ajornartorsiutit pisimasullu quarsaarnartut, soorlu timikkut persuttarneqarneq tarnikkullu mittataaneq oqaloqatigiissutigineqarnerpaasartut. Ukiullu siuliani saaffiginnissutaasut allaanerunngillat.
2009-mi ATTAVIK 146-mut sianertut 68 procentii arnaapput. Siunnersorneqarnissaminnik saaffiginnittut tamarmiusut pingajorarterutaat 20-t 29-llu akornanni ukioqarput, sisamararterutaallu 40-t 49-llu akornanni ukioqarlutik.
Inuit siunnersorneqarnissaminnik saaffiginnittut amerlanersaat Qaasuitsup kommunianinngaanneersuupput.