Oqaluttuaaqqat quianartut atuakkami nutaami atuarneqarsinnaapput

Qangatsiaq kalaallip kigutillu nakorsaata qallunaajusup quianartumik paatsooqatigiinnerat Danmarkimi kigutileriffimmi pisimavoq. Kigutit nakorsaat oqarmat " Synk - nuat iigummik paasineqartartoq!", Arnap tusaasorisimavaa ima oqartoq "Syng" - erinarsorit. Taamaattumik arnaq taanna kalaallit erinaataannik attortinnartumik erinarsorluni aallartippoq.
Allattoq Gedion Storch
oktobarip 20-at 2011 15:09

Kigutit nakorsaat tupigutsakkaluarpormi, isumaqarlunilumi taassuma anniarnini akiorniarlugu taama iliuuseqartoq. Ukiorpassuit qaangiummata paatsooqatigiinneq taanna aatsaat paasineqarpoq.

Pisimasumik oqaluttuaq taanna oqaluttuaaqqallu allat quianartut Søren Vestergaard Mikkelsenip atuakkiaani nutaami atuarneqarsinnaapput.

Atuagaq Kalaallit Nunaanni ukiuni 30-ni oqaluppalaanik asimilu angalaarluni oqaluttuassarsiorneranit katitigaavoq. Søren Vestergaard Mikkelsen, suliffeqarfimmik Eskimo Management-imik ingerlatsisuuvoq suliutinilu assigiinngitsuni ilisimaneqarluni,  soorlu Paamiut Asasara-mik, Nuuk, Illoqarfiit pingaarnersaasa qaamanersaat-nik aamma Narsami nerisassat pillugit nuannatsitsinermik Food Festival-imik pilersitsisutut.

Atuagaq Søren Vestergaard Mikkelsenip nammineq saqqummersitaraa, tuniniarneqarneralu allatulaaq ingerlanneqarpoq, tassa aqqutaa - Kalaallit Nunaannut imaluunniit Dammarkimut ingerlanneqassagaluarpat akeqanngimmat, "tassamigooq Kullorsuarmi Sakiusip aammalu Biiniamiip Årsdalemiittup, Nuummi Københavnimilu atorfilittatulli pisiarinissaanut periarfissaqarniassammata", taanna KNR-imut taama allappoq.

Kalaallit Illuutaanni Københavnimi aaqqissuussinermi atuagaq tunineqarnerani atuakkiortuanit ualimut atsioqattaarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq