Oqalutsit aningaasanut inatsimmut ilannguppaat
Danmarkimi naalakkersuisut siuliisa nakorsiartut ukiuni arfineq marlunni Danmarkimeereersimasut oqalutseqarnerminnut 150 koruuninik akiliisitsisalermata oqallinnerujussuarmik pilersitsivoq. Ilaatigut kalaallit tamatumunnga akerliuniarnerujussuisa kinguneranik, kalaallit Savalimmiormiullu inatsimmut tassunga ilaatinneqanngillat, inuilli allat 47.500-t inatsimmit tassannga kalluarneqarsimassangatinneqarput.
Naalakkersuisut tunuaqqammersut politiinut tunngatillugu ileqqaarniuteqarnissamik pilersaarutaat aamma peerneqarput. Politiinut aningaasaliissutini 500 millionit koruunit sillimmatissatut immikkoortinneqarput. Tamannalu Doris Jakobsenip nuannaarutigaa.
- Naalakkersuisut taama nalunaaruteqarnerisigut tamatumunnga atatillugu Nunatsinnut aningaasaliissutit qulakkeerneqarsinnaanerat periarfissarissaarnerulerpoq, Doris Jakobsen oqarpoq.
Taassumali kommunefogedit akissarsiaasa pitsanngorsarneqarnissaat suli ilungersuutigerusuppaa.
Aningaasanut inatsisissatut siunnersuummi isumaginninnikkut suliniutinut, immikkut aningaasaliissutit aqqutigalugit immikkut periarfissaqassaaq, taamalilluni inuiaqatigiinni sanngiinnerpaamik inissisimasunut suliniutinut aningaasaliisoqarsinnaassalluni. Tamatumani meeqqat inuusuttullu suliniarfigineqarnerat siunissami pingaarnerutinneqassasoq, Aningaasanut ministeeriaqarfiup siunnersuummut atatillugu oqaatigaa.
