Oqalutseqarnermut ullumimiit akiliisalissapput
Piffissarli kingullerpaaq atorlugu malittarisassat nutaat kalaallinut Savalimmiormiunullu atuutsinneqannginnissaat aalajangiunneqarpoq.
Malittarisassat nutaat Danmarkimi nakorsat peqatigiiffiannit angisuumik isornartorsiorneqarput, inatsillu nutaaq pillugu paasissutissat peqqinnissamut oqartussanit suli piareerneqarsimanngimmata, nakorsat peqatigiiffiat malittarisassat pillugit allagaqaateqarpoq. Aviisimi MetroXpressimi taama allaasserinnittoqarpoq.
- Nakorsat peqatigiiffiata nakorsallu inatsit allanngortinniarlugu misiliisimagaluarput, iluatsissimanngitsulli oqaatigineqarluni.
Oqalutsit aamma pakatsisimapput
- Ajorluinnartumut inissippaatigut. Piffissaq oqaluttaanermut akitsuutit pillugit nakorsiartumut oqaloqatigiissutigalugu atortariaqarparput katsorsarnissaraluannut taarsiullugu. Taamatut aallartikkaluarutta suna tamarmi isasoorsinnaavoq, Nefer Türkoglu, Attaveqaqatigiinnermut ilinniagaqarsimasut nuna tamakkerlugu Peqatigiiffianni Siulittaasoq MetroXpressimut oqarpoq.
