Oqalugiaat iluarisimaarpaat
Inatsisartut ukiakkut ataatsimiinnerat ammarlugu Naalakkersuisut siulittaasuata Hans Enoksenip oqalugiaataa oqimaatsunik imaqarpoq. Imigassamik aanngajaarniutinillu atornerluinermik, meeqqanillu atornerluisarnermik ajornartorsiuteqarnerujussuarput aaqqiivigineqartariaqalersoq Hans Enoksen oqarpoq. Oqalugiaat partiit inatsisartuniititaqartut tamat iluarisimaarpaat, apeqquserneqartut ataasiakkaat eqqaassanngikkaanni.
Siullermik Kattusseqatigiit siulittaasuat Athon Frederiksen ima naliliivoq:
-Meeqqat ajornartorsiuteqrtarnermut tunngasut paasinnissimaarpalaartumik oqaatigineqarnerat iliuuseqartoqarnissaanillu neriorsuuteqartoqarnera iluarisimaarpara.
Ilinniartitaanermi aningaasaliissutissat pilersaarusiornerat aaqqissuussinissamullu tunngasut inunnillu isumaginnittunut amigaataaqisunut tunngasut oqalugiaammi taamaattoq maqaasigini, Anthon Frederiksen isumaqarpoq.
Demokraatit siulittaasuat Per Berthelsen:
- Inuiaqatigiittut immitsinnut piumaffigineqarunissarput, ilinniarnissap qanoq pingaaruteqartiginera annertuumik taaneqarnerat nuannaarutigaara. Siornagut paqumigineqartartut –meeqqat sumiginnakkat oqalugiaammi erseqqissumik taaneqarnerat aamma nuannaarutigaara. Piujuaannartitsinissamik anersaaqarluni ingerlatsinissamik oqalugiaammi kaammattuuteqarneq aamma nuannaarutiginerarpaa.
Per Berthelsenip oqalugiaammi tusakkamini
amigaatigaa, Uummannami angallassinikkut pitsanangilluinnartumik pisoqarsimaneranut naalakkersuisut allaat utaqqatsertariaqaraluarnerat. Kuupik Kleist IAp oqaaseqartua:
- Oqalugiaat tassaavoq piffissami aggersumi Naalakkersuisnut Inatsisartullu suliniutissaasa erseqqissarnerqarnerat. Aningaasarsiornikkut siunnerfiit inuussutissarsiornikkut atugassarititat pitsanngorsarneqarnissaat minnerunngitsumik inuuniarnikkut isumaginninnikkut ajornartorsiutaasut iliuuseqarfigineqarnissaannut tunngasunik erseqqissaaneq, uagutsinnullu naammagisimaarpoq ukiuni tulliuttuni pingasuni suliassat suunersut atuagssarititaasullu suussanersut erseqqissarneqarmata.
Augusta Salling Atassutip oqaaseqartua:
-Ajunngitsumik tiguarput. Oqalugiaat, ullumikkut pissutsinik siunissamilu pilersaarutinik ersarissorujussuarmik imaqartoq oqaatigineqarsinnaavoq. Taamaattoq apeqqutit ilaqarput suliassartaasa tigunerisigut nalilersorlugillu isummersorfigisariaqartussanik, soorlu kommunit kattussuunnissaannut apeqqutit.
Naalakkersuisut siulittaasuata ammaalluni oqalugiaataa, ataasinngorpat ullaakkut Iterluarnaami sammineqassaaq, Hans Enoksen-ilu pulaartorineqarumaarpoq. Ammaanermilu oqaaserineqartut Inatsisartuni ataasinngorpat oqallisigineqassaaq.
