Oqaluffinni palasit erinnersaarneq atornerulersimavaat

Qangaanerusoq danskit oqaluffiini erinnersaartarneq oqaluffissaarsuarni taamaallaat atugaasaraluarpoq, maannali erinatoqarsuit tamakku palasinit amerlasuunit atorneqartalerput.

Ukiut 100-t matuma siornagut erinnersaartarneq danskit oqaluffiini naalagiarnerni atorunnaarsinneqarpoq. Aviisimi Kristeligt Dagbladimi allaaserineqarpoq erinnersaartarneq ileqqutut atorunnaariartortutut isigineqarsimasoq. Maannali Danmarkimi oqaluffinni erinnersaarneq atugaasorujussuanngoqqissimavoq.

Erinnersaartarneq itsaaniilli oqaluffimmi atugaasimavoq, allakkanik iluartunik atuarnermi atorneqartartoq.

Organistip Peter Weinckep Københavnimi palasinngorniarfimmi ilinniartitsisuusup ima oqaatigaa:

- Assigiinngitsunik patsiseqarluni nalliuttorsiorpaluttumik atuaasoqartarpoq. Patsisaasinnaapput inip iluata iminnarnera, atuagassap paasiuminarsarnera, itisiliineq sunnertinnerlu.

Palasit ullumikkut ammasuupput paasisaqarusuttuullutillu, isummanik pigiliutiinnakkanik peqarpallaarunnaarput oqaluttuarisaanermillu paasinnikkusuttuullutik.

- Erinnersaartoqaraangat naalagiartut malugisarpaat oqaluffiup ilua angerlarsimaffimminnit katersortarfimmillu allaalluinnartuusoq kiisalu sunnertinnissamut periarfissaqarlutik oqaluffiullu nipaannera malugisarlugu. Ulluinnarni ulapputit puigulaarlugit atuagassaq qinnullu kisiisa aallullugit, Peter Weincke oqarpoq.