Oqaatsivut piujuaannarsinnaapput
-Uani isummerfigineqartussat ilagaat, oqaatsit allattaaseqartariaqarpat?
uagut oqaatsigut ukiut 150-it pigereeratsigit, taamaalilluta kulturitta oqaluttuassartaa allaganngorlugu atuarsinnaavarput, tamannalu isumaqarpunga nakooqutigingipput. Aammalu oqaatsitta siunissami atornissaanut atorluarsinnaassallugu, Carl Christian Olsen Kangerlussuarmiit aallanngitsiartoq oqarpoq.
Nunap inoqqaavisa oqaasii piujuaannartissagaanni suut pingaaruteqarpat atussallugit?
-Pingaarnerpaavoq ila nunap inoqqaavisa namminneq oqaatsiminnik atuinissaat, soorlu uagut kalaallit aamma taamaattariaqartugut. Taamaattumik oqaatsitta ataavartinnissaannut pingaarnerpaavoq, meeqqat mikinerininngaanniit ilinniartitaaanerat tamaat aqqutigalugu oqaatsinimmik atuisinnaatitaanerat pisussaaffittut isigalugu uppernarsartuassallugu imaluunniit naqissusertuassallugu, Carl Christian Olsen oqarpoq. Taanna isumaqarpoq nunap inoqqaavisa oqaasii tuluit oqaasiisulli pingaartigimmata piujuaannartinnissaat pingaaruteqartoq.
- oqaatsit suulluunniit naligiimmik isigissagutsigit, tamarmik kulturikkut pingaaruteqarluinnartuupput, immaqa nunasiaqarnerit allallu eqqarsaatigalugit oqaatsit ilaat siammarsimanerat annertunerusinnaavoq, ksianni aamma kulturikkut imartussusii assigiinngitsut eqqarsaatigalugit tamarmik ataqqinassuseqarnerat akuersaartariaqarpoq, Carl Christian Olsen oqarpoq.
Kalaallisut oqaatsivut imaluunniit inuit oqaasii nunap inoqqaavisa allat oqaasiinut sanilliullugit qanoq innersut aperigatsinni isumalluarpoq.
-Tassa massakkut oqaasilerisut akornganni, nunat tamalaat akornganni oqaatigineqartarpoq, kalaallit oqaasii tassaasut oqaatsit nunarsuarmiooqataanermi atallutik aninguisinnaasut, tassalu taassuma pisussaaffeqartippaatigut oqaatsitta meeqqaniit ilinniarnermi ilinniagassat tamakkerlugit atorsinnaassallugit patajaallisassallugit, Carl Christian Olsen inuit oqaasiinik ilisimasalittut Naalagaaffiit Peqatigiit allaffissuanut New Yorkimukalersoq oqarpoq.
Isumasioqatigiinnermi isummiunneqartut Naalagaaffiit Peqatigiit nunap inoqqaavisa oqaasii pillugit suliniarnerani tikkuussisuussapput. Carl Christian Olsenip saqqummiussinissamini nunatsinni oqaasiliortoqarnerput nakooqqutit ilaattut tikkuarniarpaa.
