Oqaatsit pillugit siunnersuut pisiniarfiutilinnut ulorianartorsiortitsivoq

- Siunnersuut inuussutissarsiortunut mikinerusunut ajorluinnarsinnaavoq.

Nuummi pisiniarfiutillit peqatigiiffiata siulittaasua, Jan Köhler, taama oqarpoq.

Siunnersuutip kingunissai taassuma aarlerinartoqartippai:

- Tamatuma kinguneranik aningaasartuuterpassuaqalissaagut. Aningaasartuutit naggaterpiaatigut pisisartut kisimik akiligassaat, Jan Køhler oqarpoq.

Kisianni Malik Berthelsenip oqaatsit aningaasaniit pingaartinneruai.

- Nunaqavissut oqaasii puigorlugit suliffeqarfiit namminersortuunerusunit pigineqartut qallunaat oqaasiinik atuivallaarput, Malik Berthelsen oqarpoq.

Taassuma aamma tikkuarpaa, pisiniarfippassuit kalaallisut oqaluttunik sulisoqarmata, akillu taamaalillutik qaffannavianngitsut oqarluni:

- Ussassaarutitik nutsertinniarunikkit sulisutik aperiinnariaavaat. Pisisartugut aningaasarsiorfiginiarutsigit sullittavut paasisinnaasaannik sullitariaqarpavut, Malik Berthelsen, aamma Sisimiuni pølseerniarfiuteqartoq, oqarpoq.

Kisianni Jan Köhlerip Malik Berthelsenip oqarnera upperinngilaa, oqarluni, Nuummi pisiniarfiutilli Peqatigiiffianni ilaasortat ingammik kalaallit Malik Berthelsenip siunnersuutaanut akerliullutik nalunaarsimapput.

- Ilaasortatsinniit akerliullutik nalunaartuni kalaallisut oqaluttut siullernut ilaapput. Tassalu akerliusut qallunaatuinnaq oqaluttuunngillat, aamma arlariinnik oqaasillit akerliupput, Jan Køhler oqarpoq nangillunilu.

- Ilaasortagut oqarput, qanoq ittunik piseqqusaarusiornissamut nammineq aalajangersinnaatitaaneq akuliuffigineqalersoq.

Kisianni inuussutissarsiortut isumakulukkaluartut, siunnersuut Naalakkersuisunit ilalernartinneqarpoq:

- Isumaqarpunga siunnersuut pitsaasorujussuusoq, Kultureqarnermut naalakkersuisoq, Mimi Karlsen, taama oqarpoq. Taasumali inassutigaa, siunnersuut kinguartinneqassasoq. Taamaalilluni tusarniaanissaq piffissaqarfineqalissaaq, inuussutissarsiortullu tikkuaanissamut periarfissaqalissapput.

- Kikkut suna nammassinnaavat? Ussassaarutit oqaatsit marluk atorlugit naqinneqarnissaat qanoq akeqassava? Tamakkua tamaasa akissutissarseriarlugit suliaq ingerlanneqaqqissaaq.

Aammami paasiniaalluarnissaq Demokraatit kissaatigigaat, partiip oqaaseqartartua Andreas Uldum nassuiaavoq.

Erseqqissarpaali, namminersorlutik inuussutissarsiortut pisissussarsiornerminni oqaatsit suut atorusunnerlugit nammineq aalajangertassagaat:

- Tunngaviusumik isumaqarpugut, pisortat namminersortut susassaqarfii akuliuffigissanngikkaat. Andreas Uldum oqarpoq.

Aamma Nuummi pisiniarfiutillit Peqatigiiffianni isumaqarput, pisiniarfiutillit pisisartutillu maannakkutut attaveqatigiinnerat ajunngilluinartoq.

- Oqaatsit pillugit oqallinnermi sianigisariaqarpoq, pisiniarfiutillit eqqugaannginnissaat, Nuummi pisiniarfiutillit Peqatigiiffianni siulittaasoq Jan Køhler oqarpoq.