Oqaatsit pillugit peqatigiiffiliortut
Facebookkimi isummersueqatigiiffittut eqimattaq "Kalaallisummi?" aallaavigalugu ippassaq januaarip 20-iani peqatigiiffimmik pilersitsisoqarpoq.
Allattoq Simon Uldum -
Peqatigiiffimmut kikkulluunniit ilaasortanngorsinnaapput, massakkoqqissaarlu ilaasortat 646-nngoreersimallutik.
- Peqatigiiffittut suliniuutigaarput nunatsinni atuisutut aqqusaarneqartartut allagartat danskisuinnaq allaqqasut minnerpaamik aamma kalaallisut allaqqalernissaat. Angorusukkatsigummi nunatsinni innuttaasuulluta angerlarsimasutut, aallaaviusutullu misigilernissarput, peqatigiiffiup siulittaasortaava Svend-Åge Fleischer Johansen tusagassiorfinnut nalunaaruteqarluni taama allappoq.
Peqatigiiffimmut ilaasortat periarfissaqarput allagartat danskisuinnaq allaqqasut oqarasuaatit angallattakkat atorlugit assileriarlugit Facebookkimi eqimattap qupperneranut ikkunnissaannut.
- Taannalu aallaavigalugu peqatigiiffittut, assilineqarsimasut akisussaasui allagaqarfigisassavagut kaammattuilluta minnerpaamik kalaallisut aamma allattarnissaat, ilaasortat sinnerlugit, Kalaallisummi?-p siulittaasua Svend-Åge Fleischer Johansen naggasiivoq.