Oqaatsinut politikkimut piareersarput
Piseqqusaarutit takoqqussaarutilut tamarmik kalaallisut allassimanissaat augustip aallaqqaataani ukiormanna piumasaqaataalissaaq. Aamma matumani pineqarput suliffeqarfiit pisortat pigisaasa namminersortullu innuttaasunut saaffiginnissutaat. Inatsit malinngikkaanni akiliisitaasoqartalissaaq.
Tamanna tunngavigalugu Oqaasileriffimmut saaffiginnittutn amerlisimapput inatsisip atulinnginnerani suliffeqarfiit oqaatsit taaguutilli atukkatik inissinniarmatigit.
- Saaffiginnittut tassaapput suliffeqarfiit namminersortut. Pisortat suliffeqarfiutaannit annerusumik saaffinnittoqarneq ajorpoq immaqa taakku allanik siunnersorteqarsimagamik, Oqaasileriffimmiit Katti Frederiksen KNR-imut oqarpoq.
Suliffeqarfiit Oqaasileriffimmut saaffinnittut maanna qaammammut 40-ut missaanniittarput. Saaffiginnittartullu amerliartuaaginnavissimapput 2007-miit, taamanikkut ukiumut saaffiginnittartut 370-it missaanniittarmata. 2011-mi saaffiginnittut 600-ut inulaarlugit amerlassuseqarput.
- Saaffiginnittut amerleriarput oqaatsit pillugit politikkip tusagassiutini sammineqarnerata nalaani. Maanna saaffiginnittartut ikilipput sammisaq oqallisaavallaarunnaamimmat, Katti Frederiksen oqarpoq.
Pisiniarfiit arlallit piseqqusaarutitik kalaallisut qallunaatullu naqittalereerpaat. Nutserneqartulli tamatigut iluatsittuaannanngillat. Aajuku assersuutissat ilaat:
"Alussaatit tamaasa peqqinnartuutikkit - Gør hver skefuld sundere"
"Tuaviinnaq nerisassat - Et hurtigt måltid"
Taamatut ingerlaneq oqaatsitsinnik innarliisinnaasoq Oqaasileriffimmi allaffimmi pisortaq Carl Christian Olsen, Puju, oqarpoq.
- Nutserisut ilaat nutserinermut takornarniartuusarunarput. Pisortat suliffeqarfiisa suliffeqarfiillu angisuut nutserisut tamatigoornerusut atortariaqaraluarpaat, Carl Christian Olsen oqarpoq, KNR-ip ullaakkut aallakaatitaani Kumorn'imi sisamanngornermi ullaakkut pulaartuulluni.
- Takoqqusaarutit oqaasertaat sunniutilerujussuupput inuppassuarnillu atuarneqartarlutik. Taamaammat pingaartorujussuuvoq taaguutit assigiimmik tamanit atorneqarnissaat. Oqaatsit kukkusumik atoraanni taamaattussaannartut isigineqalersinnaapput taamalu oqaatsitsinnik innarliillutik, Carl Christian Olsen oqarpoq.
Oqaasileriffik saaffigineqarsinnaavoq http://www.oqaasileriffik.gl/kl/oqaasileriffik aqqutigalugu periarfissarlu taanna 2011-mi 46.303-riarluni atorneqarsimavoq saaffiginnittut amerlanersaat Danmarkimeersuullutik.
Oqaatsit pillugit politikki tusarniaassutaareerpoq aggustillu aallaqqaataa 2012 atulersussaalluni.
